NDAI sumla hta hpa hpe mu a ni? Teng ai. Gumra hpraw hpyen hpung kaba langai mi re. Shanhte gara kaw na sa wa ma ai hpe yu yu mu. Gumra ni gaw sumwi jawn nna sumsing lamu kaw na gumtawng pru wa ma ai. Sumsing lamu hta gumra majing nga a ni?

Nnga ai. Dai ni gaw gumra majing nre. Hpa majaw nga yang gumra ni gaw sumwi hta nlu gumtawng ai. Teng ai nrai ni? Raitimung Chyum Laika hta sumsing lamu na gumra ni a lam hpe ka da ai. Hpa majaw ka da ai hpe chye a ni?

Hpa majaw nga yang moi shawng de majan gasat ai shara hta gumra ni hpe law law asung jashawn ai. Dai majaw Karai Kasang gaw ga ntsa na masha ni hte majan gasat na lam nga ai hpe madun ai hku nna masha ni sumsing lamu kaw na gumra ni jawn nhtawm, pru wa ma ai lam Chyum Laika hta tsun tawn ai. Ndai majan gasat na shara amying hpe nanhte chye ma ni? Hara Magedon re da. Dai majaw gaw ga ntsa na nhkru ai lam yawng hpe jahten kau na re.

Ndai Hara Magedon hpe woi awn nna gasat na wa gaw Yesu re. Matsing a ni? Yesu gaw Yehowa mungdan a matu Yehowa hkang da ai hkawhkam re. Dai majaw Yesu gaw jan mau gup tawn ai. Nhtu gaw Karai Kasang a hpyen yawng hpe jahten kau na re, ngu ai kumla hpe madun dan ai re. Nhkru ai masha yawng hpe Karai Kasang jahten kau na lam hpe anhte mau na shara nga a ni?

Maumwi 10 hpe naw kahtap nna yu dat u. Dai hta hpa hpe mu a ni? Teng ai. Nshawp ai masha ni hpe jahten kau ai shau-ing kaba wa ai lam hpe madun tawn ai. Dai shau-ing kaba wa hkra kadai galaw dat a ni? Yehowa Karai Kasang re. Maumwi 15 hpe yu dat u. Dai hta hpa byin nga a ni? Yehowa dat dat ai wan gaw Sodom hte Gomora mare hpe jahten kau ai sumla re.

Maumwi 33 hpe mung yu dat u. Egutu masha ni a gumra ni, hpyen leng ni, hpa byin nga ai hpe yu yu u. Shanhte a ntsa hta hka lim wa nna agrawp mat hkra kadai shabyin dat a ni? Yehowa galaw dat ai. Shi a masha ni hpe makawp maga na matu galaw dat ai. Maumwi 76 hpe yu yu u. Yehowa gaw shi a amyu Israela masha ni hpe pyi shanhte a nshawp ai amu a majaw jahten kau shangun ai lam hpe mu lu ai.

Dai majaw ga ntsa na nhkru ai lam yawng hpe jahten kau na matu, sumsing lamu na hpyen kaba hpe Yehowa shangun dat na re, ngu ai lam mau shara nnga ai. Raitimung kaning rai byin wa na lam hpe laika man kaga langai mi bai hpaw nna yu yu ga.