Ngewa ya 114: Mũminũkĩlyo wa Ũthũku W’onthe
WE WĨONA kyaũ vaa? Ii nĩ ita sya mbalasi nzaũ. Ĩndĩ kwasisya vala syũmĩte. Mbalasi isu isembete syũmĩte ĩtunĩ syĩ ĩũlũ wa mathweo! Kwaw’o ki ĩtunĩ kwĩ mbalasi?
Aiee, ii ti mbalasi sya w’o. Nĩ twĩsĩ ũu nũndũ mbalasi iitonya kũsembela mathweonĩ, kana nitonya? Ĩndĩ Mbivilia nĩneenaa ĩũlũ wa mbalasi syĩ ĩtunĩ. We nĩwĩsĩ nĩkĩ?
Kĩtumi nũndũ tene mbalasi nĩsyatũmĩawa mũno kaũnĩ. Kwoou Mbivilia ĩtũtavasya ĩũlũ wa andũ matũlĩte mbalasinĩ matheete kuma ĩtunĩ kwonany’a kana Ngai e na kaũ ũkokita na andũ ĩũlũ wa nthĩ. We nĩwĩsĩ vala kaũ ũsu ũkokitĩwa ũndũ vetawa? Vetawa Ali-Maketoni. Kaũ ũsu nĩwakũmina ũthũku w’onthe ĩũlũ wa nthĩ.
Yesũ nĩwe ũkethĩwa atongoetye kaũnĩ ũsu wa Ali-Maketoni. Lilikana kana Yesũ nĩwe Yeova wanyuvie atw’ĩke mũsumbĩ wa silikalĩ Yake. Kĩu nĩkyo kĩtumĩte Yesũ ekĩa ngovia ya ũsumbĩ. Na ũvyũ ũsu wĩonany’a kana akoaa amaitha ma Ngai onthe. No tũseng’e nũndũ wa kwĩthĩwa Ngai akaananga andũ ala athũku onthe?
Kwasisya ĩngĩ Ngewa ya 10. We wĩona kyaũ vau? Kĩw’ũ Kingĩ kĩla kyaminie andũ athũku. Nũũ ũla waetie kĩw’ũ kĩu kingĩ? Nĩ Yeova Ngai. Yu kwasisya ĩngĩ Ngewa ya 15. Nĩ kyaũ kĩkwĩkĩka vau? Ndũa sya Sotomo na Ngomola iendee na kwanangwa na mwaki ũla Yeova watũmie.
Kwavua Ngewa ya 33. Kwasisya kĩla kĩendee na kwĩkĩka kwa mbalasi na makasya ma kaũ ma Amisili. Nũũ ũla watumie kĩw’ũ kĩu kyũka kĩmavw’ĩke? Nĩ Yeova. Eekie ũu nĩ kana avonokye andũ make. Kwasisya Ngewa ya 36 na ya 76. Vau nũkwona kana o na Yeova nĩwaekie andũ make, Isilaeli, manangwe nũndũ wa ũthũku woo.
Kwoou ĩndĩ, tũikasengw’e nĩkwĩthĩwa Yeova akatũma ita syake sya ĩtunĩ nĩ kana amine ũthũku w’onthe ĩũlũ wa nthĩ. Kwatata kũsũanĩa ũu ũkoonany’a kyaũ! Kwavĩndũa ĩkalatasi ngalĩko ĩsu ĩngĩ twone.
Ũvuan’yo 16:16; 19:11-16.
Makũlyo
- Nĩkĩ Mbivilia ĩnenaa ĩũlũ wa mbalasi syĩ ĩtunĩ?
- Kaũ wa Ngai vamwe na andũ athũku ĩũlũ wa nthĩ wĩtawa ata, na kĩtumi kya kaũ ũsu nĩ kyaũ?
- Tondũ visa ũkwonany’a, Ũla ũkethĩwa atongoetye nthĩnĩ wa kaũ ũsu nũũ, na ekĩĩte ngovia ya ũsumbĩ nĩkĩ, na ũvyũ wake wĩonany’a kyaũ?
- Kwa kũsisya ĩngĩ Ngewa ya 10, 15, na 33, nĩkĩ tũtaĩlĩte nĩ kũseng’a nũndũ wa kwĩthĩwa Ngai akaananga andũ athũku?
- Ngewa ya 36 na 76 syĩtwony’a ata kana Ngai akaananga andũ athũku o na ethĩwa maasya nĩmamũthaithaa?
Makũlyo ma kwongeleela
- Soma Ũvuan’yo 19:11-16.
Maandĩko monanasya vyũ ata kana Yesũ Klĩsto nĩwe ũtũlĩte mbalasi ĩsu nzaũ? (Ũvu. 1:5; 3:14; 19:11; Isa. 11:4)
Nthakame ĩsu ĩminzangĩw’e ngũanĩ ya Yesũ ya ĩũlũ yĩlũlũmĩĩlya ata kana ũsindi wake vate nzika ũkeanĩa vyũ? (Ũvu. 14:18-20; 19:13; Isa. 63:1-6)
Naaũ matonya kwĩthĩwa me itanĩ isu iatĩĩe Yesũ atũlĩte mbalasi nzaũ? (Ũvu. 12:7; 19:14; Mt. 25:31, 32)
