MA NAKAAWIL li jun chʼuut chi kawaay? Bʼar keʼelk chaq ebʼ li saqi kawaay? Ebʼ li kawaay aʼin keʼelk chaq saʼ xyanq li choql! Abʼan, ma wank tawiʼ kawaay saʼ choxa?

Moko tzʼaqalebʼ ta kawaay, naqanaw aʼin xbʼaan naq ebʼ li kawaay inkʼaʼ nekeʼru chi aanilak saʼ xbʼeen li choql. Abʼan, ma nakaanaw kʼaʼut li Santil Hu naʼaatinak chirixebʼ li kawaay saʼ choxa?

Xbʼaan naq saʼebʼ li yalok u keʼoksimank li kawaay. Joʼkan naq li Santil Hu naxye naq saʼ choxa nekeʼchalk winq saʼ xbʼeenebʼ li kawaay, re xkʼutbʼesinkil naq li Yos tyaloq saʼ xbʼeenebʼ li poyanam arin saʼ Ruuchichʼochʼ. Ma nakaanaw chanru xkʼabʼaʼ li yalok li tixkʼam chaq li Yos? Aʼan li Armagedon. Rikʼin li yalok aʼin li Yos trisi chixjunil li maaʼusilal saʼ xbʼeen li Ruuchichʼochʼ.

Li Jesus tjolominq re li yalok aʼin saʼ li Armagedon. Li Jehobʼa kixkʼe li Jesus re naq t-awabʼejinq saʼ li Xʼawabʼejilal. Joʼkan naq li Jesus wank xkoroon. Li jutzʼ chʼiichʼ naxkʼutbʼesi naq tixkamsi li xikʼ nekeʼilok re li Yos. Ma nasach qachʼool rabʼinkil naq li Yos tixsach li maaʼusebʼ xnaʼlebʼ?

Sikʼ li tzolom 10, kʼaru nakaawil saʼ li eetalil? Aʼan li bʼutʼihaʼ bʼarwiʼ keʼsacheʼk li maaʼusebʼ xnaʼlebʼ. Ani kitaqlank re li bʼutʼihaʼ? Aʼan li Jehobʼa. Anaqwan chaawil li tzolom 15, kʼaru yook chi kʼulmank aran? Li Jehobʼa kixsach rikʼin xaml li tenamit Sodoma ut Gomorra.

Sikʼ li tzolom 33, kʼaru yookebʼ xkʼulbʼal ebʼ li xkawaay ut ebʼ li xbʼelebʼaal chʼiichʼ laj Egipto? Li Jehobʼa kiʼachʼabʼank re li haʼ saʼ xbʼeenebʼ laj Egipto re xkʼolbʼal li xtenamit. Anaqwan saʼebʼ li tzolom 36 ut 76, li Jehobʼa kixkanabʼ naq tsacheʼq ru li xtenamit, xbʼaan naq yookebʼ xbʼaanunkil li maaʼusilal.

Joʼkan naq inkʼaʼ tsachq qachʼool naq li Jehobʼa tixtaqla chaq li kʼiila anjel re risinkil chixjunil li maaʼusilal saʼ xbʼeen li Ruuchichʼochʼ. Chirix chik aʼan, kʼaru tkʼulmanq?