INKI beno kemona awa? Kibuka ya bakavalo na zulu ya bampunda ya mpembe. Bampunda yai mekatuka na zulu na kutambulaka ntinu na matuti! Keti kele mpenza ti bampunda na zulu? Ikele ve.

Yau kele bampunda ya kyeleka ve. Mpunda lenda baka ve ntinu na matuti. Kansi, Bible ketubila beto nde bampunda kele na zulu. Sambu na inki?

Yau kele sambu na ntangu ya ntama, bau vandaka kusadila bampunda sambu na mvita. Na yau kana Bible ketubila beto sambu na bampunda mpi bakavalo kekulumuka na zulu, yau kele sambu na kusonga nde Nzambi tanwana mvita na ntoto. Kisika yau tavanda kebingama Armagedon. Mvita yina tasukisa mambi na ntoto.

Yezu muntu tatwadisa mvita yai ya Armagedon. Beno yibuka nde Jéhovah kusolaka Yezu sambu na kuvanda ntotila ya luyalu na Yandi. Tala sambu na nki yandi kele na mpu ya kintotila. Mbele ketendula nde yandi tafwa bambeni ya Nzambi. Na yau, Nzambi tafwa bantu yonso ya mbi. Keti yau keyitukisa beno?

Beno vutuka na Nkenda ya 10. Inki beno kemona na kifwanisu? Mvula ya Ngolo yina kufwaka bantu ya mbi. Nani kunokisaka yau? Jéhovah Nzambi. Inki beno kemona na kifwanisu ya Nkenda ya 15? Lufwa ya Sodome na Gomore na tiya yina Jéhovah kutindaka.

Beno baka Nkenda ya 33. Beno kemona mambu yina kebwila bampunda mpi bapusupusu ya bitumba ya bantu ya Egypte? Nani vukisaka masa na kati na yau? Yau kele Jéhovah, yina zolaka kugulusa kikanda na yandi. Mpi Nkenda ya 76 kelonga beno inki? Jéhovah kepesa nswa nde kikanda na yandi, bantu ya Izraele, kufwa sambu na mambi na bo.

Na yau, beno yituka ve sambu Jéhovah kezola kutinda basoda na yandi ya zulu sambu na kusukisa mambi na ntoto. Beto tala ntangu yai mambu yina tabwa na nima.