NĨKĨĨ ũrona haha? Ĩĩni, nĩ ita rĩhaicĩte mbarathi njerũ. No ningĩ ta rora kũũrĩa iroima. Mbarathi irahanyũka hanyũka matu-inĩ kuuma igũrũ! Kũna kũna-rĩ, igũrũ nĩ kũrĩ mbarathi?

Aca, tondũ ici ti mbarathi cia biũ. Nĩ tũũĩ ũguo tondũ mbarathi itingĩhota gũteng’erera matu-inĩ, no ihote? No ĩndĩ Biblia nĩ yaaragia ũhoro wa mbarathi kũu igũrũ. Nĩ ũũĩ nĩkĩ gĩtũmaga ĩgwete ũguo?

Gĩtũmi nĩ ũndũ ihinda rĩmwe mbarathi nĩ ciahũthagĩrũo mũno mbaara-inĩ. Kwoguo Biblia ĩtwĩraga ũhoro wa andũ mahaicĩte mbarathi kuuma igũrũ kuonania atĩ Ngai e na mbaara na andũ a gũkũ thĩ. Nĩ ũũĩ handũ hau mbaara ikarũĩrũo hetagwo atĩa? Hari-Magedoni. Mbaara ĩyo nĩyo ĩkaananga waganu wothe igũrũ rĩa thĩ.

Jesu Nĩwe ũgatongoria kũrũa mbaara ĩyo ya Hari-Magedoni. Ririkana Jesu nĩwe ũthurĩtwo nĩ Jehova atuĩke mũthamaki wa thirikari Yake. Nĩkĩo gĩtũmi Jesu ehumbĩte thũmbĩ ya mũthamaki. Na ruo rũhiũ ruonanagia atĩ nĩ akoraga thũ ciothe cia Ngai. No tũgegio nĩ kũigua atĩ Ngai nĩ akananga andũ othe aganu?

Ta coka na thutha Rũgano rwa 10. Nĩ kĩĩ ũrona hau? Ĩĩni, ndĩrona Kĩguũ kĩrĩa kĩnene kĩanangire andũ aaganu. Nũũ watũmire Kĩguũ kĩu kĩgĩe? Nĩ Jehova Ngai. Rĩu tarora Rũgano rwa 15. Nĩ kĩĩ kĩrekĩka hau? Mĩciĩ ya Sodomu na Gomora nĩ kwanangwo ĩranangwo na mwaki ũrĩa Jehova aarehire.

Rĩu nĩ tuone Rũgano rwa 33. Ta rora wone ũrĩa mbarathi na ngari cia mbara cia Amisiri ireka. Nũũ watũmire maĩ moke mamahehenje? Nĩ Jehova. Eekire ũguo nĩ getha agitĩre andũ ake. Ta rora rĩu Rũgano rwa 76. Nĩ ũkuona hau atĩ Jehova nĩ aarekereirie andũ ake, Aisiraeli, manangwo nĩ ũndũ wa waganu wao.

Kwoguo rĩu, tũtiagĩrĩirũo nĩ kũgega atĩ tondũ Jehova nĩarĩtũma ita rĩake rĩa matu-inĩ nĩgetha anine waganu wothe thĩinĩ wa thĩ. No ta wĩcirie ũguo hihi nĩ kuuga atĩa! Garũra karatathi tuone.