IHI IU ua mu mona bhabha? Masoladi ku jikabalu ja zele. Maji tala ku ja mu tundila. O jikabalu ja mu kuíza ni dikabakaba mu matuta tundé ku diulu! O kuila ku diulu kuala jikabalu?

Kana, ki jikabalu ja kidi. Tuejiia kuma o jikabalu ki ji tena ku lenga ku matuta, ki kiene? Maji o Bibidia izuela maka alungu ni jikabalu ku diulu. Uejiia se mukonda diahi?

Mukonda mu ukulu athu akexile mu ku ambata jikabalu ku ita. Kienhiki, o Bibidia izuela ia lungu ni athu kuendesa jikabalu tundé ku diulu, phala ku idikisa kuila Nzambi ua-nda bhanga ita ni athu mu ixi. Uejiia kiebhi kia xana o ita íii? Alumajedone. O ita íii ia-nda zubha o kuiibha kuoso mu ixi.

Jezú ua-nda kala ku pholo ia ita ia Alumajedone. Ua lembalala kuma, Jihova ua solo Jezú phala ku kala sobha ia nguvulu Iê. Kienhiki, Jezú uala ni kitundu kia sobha. O xibhata idikisa kuma, muéne ua-nda jibha o jinguma joso ja Nzambi. O kuijiia kuma Nzambi ua-nda buika athu oso aiibha, i tu sasumukisa?

Tala ku Musoso ua 10. Ihi i ua mu mona bhabha? O Dilúvio dionene dia buika athu oso aiibha. Nanhi ua bheka o Dilúvio didi? Jihova Nzambi. Tala mu Musoso ua 15. Ihi ia bhiti-mu? Sodoma ni Ngomola ai buika ku túbhia kua tumikisa Jihova.

Tala ku Musoso ua 33. Tala ihi ia mu bhita ni jikabalu, ni makalu a ita ia akua Ijitu. Nanhi ua bhange o menha kuíza ku thandu diâ? Jihova. Muéne ua bhangele kienhiki phala ku bhulula o mundu uê. Tala ku Musoso ua 76. Bhenhobho ua-nda mona kuila Jihova uehela o mundu uê, Izalaiele ku a buika mukonda dia kuiibha kuâ.

Kienhiki, ki tua tokala ku sasumuka mu kuijiia kuila Jihova ua-nda bheka o kifuxi kiê kia diulu phala ku zubha o kuiibha kuoso mu ixi. Banza ngó, se íii ia-nda lombolola ihi! Bhilula o difu ni u tale.