WETIN yu de si na di pikchɔ? Na pipul dɛn we de go fɛt wɔ, ɛn dɛn ɔl sidɔm pan wayt ɔs. Bɔt luk usay dɛn de kɔmɔt. Di ɔs dɛn de kɔmɔt na ɛvin, ɛn dɛn de rɔn pantap di klawd. Yu tink se ɔs dɛn de na ɛvin?

Nɔ, ɔs dɛn nɔ de de. Dɛn ɔs ya nɔto tru tru ɔs dɛn. Wetin mek wi se so? Na bikɔs ɔs dɛn nɔ ebul rɔn pantap klawd. Bɔt di Baybul tɔk se ɔs dɛn de na ɛvin. Yu no wetin mek di Baybul tɔk so?

Na bikɔs trade trade, dɛn bin de yuz ɔs dɛn fɔ fɛt wɔ. So we di Baybul de tɔk bɔt pipul dɛn we de rayd ɔs dɛn de kam dɔŋ na di wɔl, i min se Gɔd gɛt fɔ fɛt di pipul dɛn we de na di wɔl. Yu no aw dɛn kɔl di ples usay dɛn gɛt fɔ fɛt dis wɔ? Dɛn kɔl am Amagɛdɔn. Da wɔ de go pul ɔl di pipul dɛn we de du bad bad tin dɛn na di wɔl.

Na Jizɔs gɛt fɔ de bifo fɔ fɛt dis wɔ na Amagɛdɔn. Mɛmba se na Jizɔs na di kiŋ fɔ Gɔd in gɔvmɛnt. Na dat mek Jizɔs wɛr di tin we kiŋ dɛn kin wɛr na dɛn ed. Ɛn di sɔd we i ol sho se i gɛt fɔ kil ɔl di pipul dɛn we nɔ lɛk Gɔd. Yu tink se wi fɔ sɔprayz we Gɔd de kam pul ɔl di bad pipul dɛn?

Tɔn na Stori 10. Wetin yu de si de? Na di Ebi Ren we bin kil di bad pipul dɛn. Na udat bin mek di Ebi Ren kam? Na Jiova Gɔd. Tɔn naw na Stori 15. Wetin de apin de? Wi de si we Jiova bin mek faya bɔn Sɔdɔm ɛn Gomɔra.

Tɔn na Stori 33. Luk wetin de apin to di Ijipshian dɛn ɔs dɛn ɛn dɛn chariɔt dɛn. Na udat bin mek di wata kɔba dɛn? Na Jiova. I du am fɔ sev in pipul dɛn. Luk Stori 36 ɛn Stori 76. Wi si se Jiova mek dɛn kil in yon pipul dɛn, bikɔs dɛn bin de du bad.

So wi nɔ fɔ sɔprayz if Jiova sɛn in sojaman dɛn we de na ɛvin, fɔ kam kil ɔl di bad pipul dɛn na di wɔl. Yu no aw di wɔl go tan lɛk we dat go dɔn bi? Tɔn na di ɔda stori lɛ wi si.