MBA findo ulukubona pano? Inya, ifita pali bakafwalo abatubile. Pano bona ukubalukufuma. Bakafwalo balukubutuko’kuseluka ukufuma mwiulu mu makumbi! Mba muli bucine mulipo bakafwalo mwiulu?

Koku, aba tabalipo ni bakafwalo ba cinenene. Tulisi ici nipakuti bakafwalo tekuti babutukepo mu makumbi, tali e fyenka? Pano Baibolo ilalabila pali bakafwalo mwiulu. Mba kani uliwisi umulandu ilabililapo?

Nipakuti kwali’mpindi bakafwalo balukubapyunjisya ukwakuti mu kulwe’nkondo. Pano Baibolo ilalabila pa bantu abaninine pali bakafwalo ukufuma mwiulu ukutubula ati baLesa bali pa nkondo ya kulwa ne bantu pa calo. Mba uliwisi umupunda wa yiyi inkondo ifi bawita? Amagedono. Iyi ni nkondo ya konala bumbifi bonse pa calo.

BaYesu bakaba ni ntangisi ya kulwa kwa yiyi inkondo pa Amagedono. Anuka ukweba’ti, baYesu ebo baYehoba basobwele ukube’mfumu ya buteko Bwabo. Emulandu baYesu bafwalile icisoti ca bufumu ku mutwi wabo. Kabili impoko ilukulanga ati bakepaya abapate ba baLesa bonse. Mba kani tulyelelwe ukukankamana ukweba’ti bakonala abantu imbifi?

Lolesya pa Cisimicisyo 10. Cindo wabona palya? Inya, ubulobe bwa menda bwalyonawile abantu imbifi. Mba ninani walengele ubulobe? BaYehoba Lesa. Pano lolesya pa Cisimicisyo 15. Pano nindo ilukucitika palya? Sodoma na Gomola filukonalwa ne mulilo baYehoba batuma.

Fungula pa Cisimicisyo 33. Bona ifilukucitika kuli bakafwalo ne ngolofwana sya nkondo isya baIjipiti. Mba nibani balengele amenda ukwisa ne kuwila pali bo? BaYehoba. Balicitile’fi ku kucingilila abantu babo. Lolesya pa Cisimicisyo 76. Wakubona palya ukweba’ti baYehoba baleka ne bantu babo, abaIsilaeli, ukonalwa pakuti pa fyakubifya ifi balukucita.

Popele, tekuti tukankamanepo pano ukweba’ti baYehoba bakatume’fita fya mwiulu ukwisa mu kusilisya bumbifi bonse pa calo. Pano languluke’fi ici cikapilibula! Fungule’bula kabili leka tubone.

Ukufisulula 16:16; 19:11-16.