Kukuma Chaupi Wosena
Chihande 114
Kukuma Chaupi Wosena
VYUMA vika unakumona hano? Eyo, vaka-kwasa jita vali hatuvalu vatoma. Jino tala okwo vanakufuma. Tuvalu vanakusuluka mwilu hamavwi! Uno mwilu mwatwama tuvalu vamuchano tahi?
Nduma, ava kaveshi tuvalu vamuchanoko. Tunejiva ngocho mwomwo tuvalu kaveshi vatambuke hamavwiko, ngwetu? Oloze Mbimbiliya yahanjika vyatuvalu mwilu. Unejiva ovyo yahanjikila ngocho nyi?
Mwomwo kushikulu tuvalu vavazachishilenga chikuma mujijita. Shikaho Mbimbiliya yavuluka vyavaka-tuvalu navafuma mwilu, kusolola ngwayo Kalunga mwakalyasa jita navatu hamavu. Unatachikiza muvachivuluka echi chihela chajita tahi? Ngwavo Alamangetone. Jita kana nayikakumisa upi wahamavu wosena.
Yesu ikiye mwakatwaminyina eyi jita kana haAlamangetone. Nawanuka, Yesu ikiye vasakula kuli Yehova kupwa mwangana wafulumende Yenyi. Shikaho Yesu navwale muchama wawangana. Kaha poko yamukwale yinakusolola nge mwakajiha vaka-kole jaKalunga vosena. Uno twatela kulikomokela ngwetu Kalunga mwakenyeka vatu vavapi vosena nyi?
Hiluka kuChihande 10. Yika unamonoho? Eyo, Livaji lyalinene lize lyenyekele vatu vavapi. Iya anehele Livaji kana? Yehova Kalunga. Jino tala haChihande 15. Vyuma vika vinakusolokaho? Jinganda jaSotome naNgomola jinakuwema kukakahya atumine Yehova.
Pandumuna nawa Chihande 33. Tala vinakusoloka kutuvalu namatemba ajita avaEjipitu. Iya alingishile meya numba ezenga nakuvafwika? Yehova. Alingile ngocho mangana akinge vatu jenyi. Tala cheka Chihande 76. Nauwana nge Yehova echele navatu jenyi, vaIsalele, vavenyeke haupi wavo.
Shikaho, kumana, katwatela kulikomokelako nge Yehova mwakatuma majita avaze vali mwilu kwiza nakukumisa upi wahamavu wosena. Achishinganyeke omwo navikapwa vyuma jino! Pandumuna lifwo mangana tutale kanawa.