Kukuma kwaYuma Yatama Yejima
MPANJI 114
Kukuma kwaYuma Yatama Yejima
CHUMANYI chiwunakumona ahanu? Eña, amashidika adi hatuwalu tutooka. Ilaña talaku kuyanakufuminawu. Tuwalu tunakutemuka lufuchi kufuma mwiwulu hamavu! Chalala mwiwulu mwekala tuwalu?
Inehi, itu hituwalu twalalaku. Tuneluki chenichi muloña tuwalu hitunatweshi kutemukila hamavuku, tahindi tukutwesha? Ilaña Bayibolu yahoshaña hadi tuwalu twamwiwulu. Wuneluki muloña wuyahoshelaña chenochu?
Muloña mpinji yakunyima, tuwalu atuzatishileña nankashi hakuzuña majita. Dichi Bayibolu yinakushimuna hadi antu anakwendela hatuwalu kufuma mwiwulu kulonda kumwekesha nawu Nzambi wukweti njita yakulwa nawantu hamaseki. Wuneluki chaditenañawu idi iluña danjita? Amagedoni. Iyi njita yikafumishahu kutama kwejima hamaseki.
Yesu Diyi wukekala nlomboli hakulwa muniyi njita yahaAmagedoni. Anukaku, Yesu diwuyatondawu kudi Yehova kwikala mwanta wanfulumendi Yindi. Dimuloña waweni Yesu chinavwaliliyi chibañula chawanta. Mpoku yakabali yinakumwekesha nawu wakajaha ayilumbu jaNzambi ejima to-o. Komana twatela kuhayama netu Nzambi wukajilumuna antu ejima atama?
Talaku kunyima haMpanji 10. Chumanyi chiwunamonihu? Eña, Dibaji deneni dajilumwini antu atama. Waleteli dina Dibaji hinyi? Yehova Nzambi diyi. Ichi dinu talaku haMpanji 15. Chumanyi chinakumwekana ahana? Sodoma naGomora anayijilumuni dehi nakesi katemesheliyi Yehova.
Bakulaku haMpanji 33. Talaña chuma chinakuyimwekena atuwalu nimakalu anjita yaweniEjipitu. Hinyi waletesheli menji kwinza nakuyibutilamu? Yehova diyi. Welili chenichi kulonda kukiña antu jindi. Talaku haMpanji 76. Wukumona kwila neyi Yehova wetejeli niantu jindi, aIsarela kuyijilumuna hamuloña wakutama kwawu.
Dichi dinu, hitwatela kuhayama netu Yehova wakatemesha mashidika indi amwiwulu nakukumisha kutama kwejima hamasekiku. Toñojokaku ochu yuma chiyakekala! Bakulaku ifu tutali.
