¿NEL tnikʼa tiʼ tkuʼx toj tilbʼilal? Jun kʼloj chej nimxix kybʼet saq kyiʼj. Naqtzun aju qʼonk twitza jatumel ma chi tzaja chej. ¡Nchi lipen tibʼaj muj toj kyaʼj! ¿Ateʼpetzulo chej toj kyaʼj?

Aqe jlu nya axtok chejqe. Nel qnikʼ tiʼj jlu, tuʼnju mitiʼ nbʼent kylipen chej tibʼaj muj. Atzunte Tyol Dios in yolin kyiʼj qe chej toj kyaʼj. ¿Nel tnikʼa tiquʼn?

Tuʼnju, nchi ajbʼentaq chej tuj qʼoj ojtxi. Kyjuʼtzun ntzaj tmaʼn Tyol Dios qa nchi kuʼtz xjal tukʼe kychej toj kyaʼj tuʼn ttzaj tyekʼen qa kqʼojil Dios kyiʼj xjal twitz Txʼotxʼ. ¿Tiʼ tbʼijo qʼoj lu? Armagedón, aju qʼoj lu kbʼel tnajsaʼn tkyaqil mya bʼaʼn twitz Txʼotxʼ.

A Jesús kbʼel nej toj Armagedón aju tqʼoj Dios. Qa naʼnx tuʼna, o jaw jyoʼn Jesús tuʼn Jehová tuʼn tok te ajkawil toj Tkawbʼil. Tuʼntzunju tok jun corona tiʼj twiʼ Jesús. Atzunju espada ntzaj tyekʼin qa ok chi kbʼel tbʼiyoʼn Jesús kykyaqil qeju ajqʼoj tiʼj Dios. ¿Okpetzulo qo jawil sekʼpaj (labʼti) tuʼn jlu?

Jyonkuxa txʼolbʼabʼil 10. ¿Tiʼ tzaj? Tzaj Nimxix Jbʼal aju kubʼ tnajsaʼn tkyaqil mya bʼaʼn xjal. ¿Alquʼn tzaj Nim Jbʼal? Tuʼn qMan Jehová. Atzun jaʼle jyonkuxa txʼolbʼabʼel 15. ¿Tiʼ bʼaj atztzu? Kubʼ t-xiten Jehová Sodoma ex Gomorra tukʼe qʼaqʼ.

Jyontztla txʼolbʼabʼil 33. Qʼonk twitza tiʼ nbʼaj kyiʼj kychej ex kyiʼj kykarro aj Egipto te qʼojbʼel. ¿Alquʼn tzaj mulqʼaj aʼ kyibʼaj aj Egipto? Tuʼn Jehová. Bʼant jlu tuʼn, tuʼn tkolin tiʼj ttnam. Ax ikx jyontztle txʼolbʼabʼel 36 ex 76. Atz kʼelel tnikʼa qa xi tqʼoʼn Jehová ambʼil tuʼn tkubʼ xiten ttnam tuʼnju ok te mya bʼaʼn.

Tuʼntzunju, mitiʼ tuʼn qjaw sekʼpaj qa tzul tsamaʼn Jehová jun kʼloj ajqʼojil tuj kyaʼj tuʼn tkubʼ tnajsaʼn tkyaqilju mya bʼaʼn nbʼaj twitz Txʼotxʼ. ¿Tiʼtzulo kbʼajel yajxitl?Qo ikʼx tuj juntl t-xaq tuʼntzun tel qnikʼ tiʼj.