Ijkuak tlamis nochi tlen amo kuali
TLAPOUALISTLI 114
Ijkuak tlamis nochi tlen amo kuali
¿TLEN tikita nikan? Kema, miakej tlakamej tlen uitsej ipan caballos istakej. Maski ijkon, xikita ik kanin uitsej. ¡Caballos ualmotlalojtokej ipan mixtli! ¿Yetokej caballos itech iluikak?
Ninmej amo melauak caballos. Ijkon tikijtoaj pampa caballos amo ueli nemij ipan mixtli, ¿amo melauak? Maski ijkon, Biblia kema tlajtoa itech sekimej caballos tlen nemij iluikak. ¿Tikmati tleka?
Pampa yiuejkika omotekitiltiayaj caballos itech guerras. Ik non, Biblia kijtoa akinmej ualtemoaj itech iluikak ipan caballos kiteititiskej toTajtsin Dios kichiuas se guerra iuan nochtin tlaltikpaktlakamej. ¿Kanin mochiuas? Itech Armagedón, uan kipojpolos nochi tlamantli tlen amo kuali ipan Tlaltikpak.
Jesús ye Akin kiyekanas nin guerra tlen itoka Armagedón. Xikilnamiki, Jehová okipejpenki Jesús pampa ma yeto ken ueyi tekiua itech Itekiuajkayo. Ik non, Jesús kipia se corona ipan itsonteko. Uan espada kiteititia ye kinmiktis nochtin akinmej kikokoliaj toTajtsin Dios. ¿Mitstlajtlachialtia tikmatis toTajtsin Dios kinmixpolos nochtin tlen amo yolkualmej?
Xiktemo Tlapoualistli 10. ¿Tlen tikita? Kema, ueyi Apachiuilistli tlen okinmixpolo tlaltikpaktlakamej tlen amo yolkualmej. ¿Akin okichi ma kiaui miak? Jehová Dios. Axkan xikita Tlapoualistli 15. ¿Tlen opanok ompa? Ika tlitl, Jehová okipojpolo Sodoma uan Gomorra.
Xikita Tlapoualistli 33. Xikita tlen okinpanok ninmej caballos uan carros tlen okipiayaj egipcios. ¿Akin okichi ma meltsimakan? Jehová. Ijkon okichi pampa okimalui ialtepetl. Xiktemo Tlapoualistli 76. Ompa tikitas Jehová noijki okitekauili ma kixpolokan ialtepetl pampa okichijkej tlen amo kuali.
Ik non, amo techtlajtlachialtia tikmatiskej Jehová kintitlanis iángeles pampa ma kipojpolokan nochi tlen amo kuali tlen onka itech Tlaltikpak. ¿Tlen panos satepan? Ma tikitakan okse tlapoualistli.
