Kgaolo 114: Bofelo bja Bobe ka Moka
O BONA eng mo? Ee, ke madira ao a nametšego dipere tše tšhweu. Eupša bona gore a tšwa kae. Dipere tše di theoga di etšwa legodimong gomme di kitima godimo ga maru! Na ruri go na le dipere legodimong?
Aowa, tše ga se dipere tša kgonthe. Re tseba se ka gobane dipere di ka se kitime godimo ga maru, na ga go bjalo? Eupša Beibele e bolela ka dipere tšeo di lego legodimong. Na o a tseba gore ke ka baka la’ng?
Ke ka gobane kgale dipere di be di dirišwa kudu dintweng. Ka gona, Beibele e bolela ka batho bao ba nametšego dipere ba theoga legodimong go bontšha gore Modimo o na le ntwa yeo a tlago go elwa le batho mo lefaseng. Na o a tseba gore lefelo leo ntwa ye e tlago go lwelwa go lona le bitšwa eng? Le bitšwa Haramagedone. Ntwa yeo e tla fediša bobe ka moka mo lefaseng.
Jesu ke Yena yo a tlago go eta pele madira a ge go lwewa ntwa ye ya Haramagedone. Gopola gore Jesu ke yena yo Jehofa a mo kgethilego gore e be kgoši ya mmušo wa Gagwe. Ke ka baka leo a rwelego mphapahlogo. Le gona tšhoša yeo a e swerego e bontšha gore o tla bolaya manaba a Modimo ka moka. Na re swanetše go makatšwa ke gore Modimo o tla fediša batho ba babe ka moka?
Phetla go Kgaolo 10. O bona eng moo? Ee, ke Meetsefula a magolo ao a ilego a fediša batho ba babe. A tlišitšwe ke mang? Ke Jehofa Modimo. Bjale phetla go Kgaolo 15. Go direga’ng moo? Sodoma le Gomora di fedišwa ka mollo woo Jehofa a o rometšego.
Phetla go Kgaolo 33. Bona seo se diragalelago dipere tše le dikoloi tša ntwa tša Baegipita. Ke mang yo a dirilego gore meetse a a ba khupetše? Ke Jehofa. O dirile se e le gore a šireletše batho ba gagwe. Bjale phetla go Kgaolo 76. Moo o tla bona gore Jehofa o ile a ba a tlogela le batho ba gagwe ba Isiraele gore ba fedišwe ka baka la bobe bja bona.
Ka gona, ga se ra swanela go makatšwa ke gore Jehofa o tla romela madira a gagwe a legodimong go tlo fediša bobe ka moka mo lefaseng. Eupša e fo nagana ka seo se tlago go direga ge bobe bo fedile! Phetla letlakaleng le le latelago gomme re bone.
Kutollo 16:16; 19:11-16.
Dipotšišo
- Ke ka baka la’ng Beibele e bolela ka dipere tšeo di lego legodimong?
- Ntwa yeo Modimo a tlago go e lwa le batho ba babe mo lefaseng e bitšwa’ng, gomme morero wa ntwa yeo ke ofe?
- Go ya ka seswantšho se, ke mang yo a tlago go etelela ntwa yeo pele, ke ka baka la’ng a rwele mphapahlogo, gona tšhoša ya gagwe e bontšha’ng?
- Ge re lebelela morago go Dikgaolo 10 le 15, ke ka baka la’ng re se ra swanela go makatšwa ke gore Modimo o tla fediša batho ba babe?
- Dikgaolo 33, 36 le 76 di re bontšha bjang gore Modimo o tla fediša batho ba babe gaešita le ge ba ipolela gore ba a mo rapela?
Dipotšišo tša tlaleletšo
- Bala Kutollo 19:11-16.
Mangwalo a bontšha bjang ka mo go kwagalago gore Jesu Kriste ke yena monamedi wa pere e tšhweu? (Kut. 1:5; 3:14; 19:11; Jes. 11:4)
Madi ao a gašitšwego seaparong sa Jesu sa ka ntle a hlatsela bjang gore phenyo ya gagwe ke ya makgaolakgang e bile ke e feletšego? (Kut. 14:18-20; 19:13)
Ke bomang bao mohlomongwe ba akaretšwago madireng ao a latelago Jesu ge a nametše pere ya gagwe e tšhweu? (Kut. 12:7; 19:14; Mat. 25:31, 32)
