Ekitebyo 114

Omuheru gw’Obubi Bwona

N’ENKI eki orikureeba aha? Eego, n’eihe aha mbaraasi zirikwera. Kwonka yetegyereze ei zirikuruga. Embaraasi nizishuuma niziruga omu iguru omu bicu! Omu iguru buzimazima habamu embaraasi?

Ngaaha, ezi ti mbaraasi za buzima. Nitumanya eki ahabw’okuba embaraasi terikubaasa kwirukira aha bicu, tikwo? Kwonka Baibuli neegamba aha mbaraasi omu iguru. Noomanya ahabw’enki erikugira etyo?

N’ahabw’okuba obwaira embaraasi zikaba nizikoresibwa omu kurwana entaro. N’ahabw’ekyo Baibuli neegamba aha bantu batembire embaraasi abarikushuuma kuruga omu iguru okworeka ngu Ruhanga aine orutaro oru araije kurwana n’abantu b’omu nsi. Noomanya oku omwanya gw’oru rutaro gurikwetwa? Ni Haramagedoni. Orutaro orwo ruryacwekyereza obubi bwona omu nsi.

Yesu Niwe araije kwebembera omu kurwana orutaro oru ahari Haramagedoni. Ijuka ngu Yesu niwe Ruhanga yaatoraine kuba omugabe w’Obutegyeki Bwe. Egi niyo nshonga ahabw’enki Yesu ajwaire ekirunga ky’obugabe. Kandi zaarurara nizooreka ngu naija kwita abazigu ba Ruhanga boona. Eki kishemereire kuba nikitutangaaza ngu Ruhanga naaza kuhwerekyereza abantu ababi boona?

Garuka oreebe aha Kitebyo 10. Nooreebaho ki? Eego, n’Omwegyemure gw’amaizi rugambwa ogwahwerekyereize abantu babi. N’oha owaaretsire omwegyemure ogwo? Ni Yehova Ruhanga. Hati reeba aha Kitebyo 15. N’enki ekirikubaho aho? Sodoma na Gomora birikucwekyerezibwa omuriro ogu Yehova yaayohereize.

Shuuruura oze aha Kitebyo 33. Reeba ekirikuba aha mbaraasi hamwe n’ebigaari by’orugamba eby’Abanyamisri. N’oha owaareetaire amaizi kushandaara gakashweka boona? Ni Yehova. Akakikora okurinda abantu be. Reeba Ekitebyo 76. Noija kureeba ngu Yehova hoona akaikiriza n’abantu be, Abaisraeli, okuhwerekyerezibwa ahabw’obubi bwabo.

N’ahabw’ekyo hati titushemereire kutangaara ngu Yehova naija kwohereza amahe ge okumaraho obubi bwona omu nsi. Kwonka teekateeka eki eki kiraije kumanyisa! Shuuruura orupapura reero tureebe.

Okushuuruurwa 16:16; 19:11-16.