DUZU a ɛnwu ye wɔ ɛke a? Ɛlɔnema mɔɔ dede mgbɔnwɔ fufule zo la ɔ. Noko yɛ ɛleka mɔɔ bɛvi bɛlɛba la nzonlɛ. Mgbɔnwɔ ne mɔ lɛ ɛnriandilɛ vi anwuma a bɛlua amungu ne anu bɛlɛba a! Asoo mgbɔnwɔ amgba wɔ anwuma ɔ?

Kyɛkyɛ, ɛhye mɔ ɛnle mgbɔnwɔ kpalɛ. Yɛze ye zɔ ɔluakɛ mgbɔnwɔ ɛngola ɛnriandi wɔ amungu ne anu, ɔnle zɔ ɔ? Noko Baebolo ne ka anwuma mgbɔnwɔ nwo edwɛkɛ. Ɛze deɛ mɔɔ ɔti ɔka ye zɔ la ɔ?

Ɔka ye zɔ ɔluakɛ mekɛ bie mɔɔ ɛze ɛhɔ la ɛnee bɛfa mgbɔnwɔ bɛdi gyima dɔɔnwo wɔ konle nu. Yemɔti Baebolo ne ka menli mɔɔ dede mgbɔnwɔ zo bɛvi anwuma bɛlɛba aze la anwo edwɛkɛ fa kile kɛ Nyamenle ne menli mɔɔ wɔ azɛlɛ ye azo la baho konle. Asoo ɛze ɛleka mɔɔ bɛbaho konle ɛhye la duma? Bɛfɛlɛ ye Amagɛdɔn. Zɔhane konle ne baye ɛtaneyɛlɛ kɔsɔɔti avi azɛlɛ ye azo.

Gyisɛse a le Ahenle ne mɔɔ bali bɛ nyunlu aho konle ɛhye wɔ Amagɛdɔn a. Kakye kɛ, Gyisɛse a le ahenle ne mɔɔ Gyihova kpale ye kɛ ɔli Ye arane ne azo belemgbunli a. Ɛhye ati a Gyisɛse zo belemgbunli abɔtile la. Na dadeɛ ne kile kɛ ɔbahu Nyamenle kpɔvolɛma kɔsɔɔti. Asoo ɔwɔ kɛ ɔsi yɛ nwo kɛ Nyamenle bazɛkye ɛtanevolɛma kɔsɔɔti la ɔ?

Sia ɛ nzi nea Ɛzukoalɛdeɛ 10 ne. Duzu a ɛnwu ye wɔ ɛkɛ ne a? Ɛhɛe, Azuyilɛ kpole ne mɔɔ zɛkyele ɛtanevolɛma la ɔ. Nwane a manle Azuyilɛ ne rale a? Gyihova Nyamenle ɔ. Akee nea Ɛzukoalɛdeɛ 15 ne. Duzu a ɛlɛkɔ zo wɔ ɛkɛ ne a? Senle mɔɔ vi Gyihova ɛkɛ ne la ɛlɛsɛkye Sodɔm nee Gomɔla.

Buke Ɛzukoalɛdeɛ 33 ne. Nea mɔɔ ɛlɛsi Yigyibitima mgbɔnwɔ nee konle ehwili ne mɔ anwo zo la. Nwane a manle nzule ne rahedale bɛ nwo zo a? Gyihova ɔ. Ɔyɛle ye zɔ ɔvale ɔbɔle ye menli ne anwo bane. Nea Ɛzukoalɛdeɛ 76 ne. Ɛbanwu ye wɔ ɛkɛ ne kɛ Gyihova manle bɛzɛkyele ye menli Yizilayɛma bɔbɔ, ɔlua bɛ nyɛleɛ ɛtane ti.

Yemɔti, ɔnle kɛ ɔsi yɛ nwo kɛ Gyihova bazoa ye anwuma ɛlɔnema yeamaa bɛava azɛlɛ ye azo ɛtaneyɛlɛ kɔsɔɔti bɛara awieleɛ a. Na dwenle mɔɔ zɔhane bahile la anwo nea! Buke mukelɛ ne anzi na maa yɛnlea.