SAN yu e si dya? Iya, wan legre na tapu weti asi. Ma luku pe den e komoto kon. Den asi e saka komoto na hemel èn den e lon plakatá-plakatá na tapu den wolku. Asi de trutru na hemel?

Nôno, disi a no trutru asi, bika asi no kan lon na tapu wolku, a no so? Ma toku Bijbel e taki fu asi na hemel. Yu sabi fu san ede?

Na fu di fositen den ben gebroiki asi furu na ini feti. Sobun, Bijbel e taki fu sma di e rèi na tapu asi, di e saka komoto na hemel, fu sori taki Gado sa feti wan feti nanga libisma na grontapu. Yu sabi fa a presi nen pe a feti disi sa feti? Armagedon. A feti disi sa wai ala ogridu puru na grontapu.

Yesus na a sma di sa teki fesi na ini a feti disi na Armagedon. Soleki fa yu sabi, dan Yehovah ben teki Yesus leki kownu fu a tiri fu en. Dati meki Yesus e weri wan kownu-ati. Èn a feti-owru e sori taki a sa kiri ala den feanti fu Gado. A musu fruwondru wi, taki Gado wani pori ala ogri sma?

Luku Tori 10 ete wan tron. San yu e si drape? Iya, a bigi Frudu di ben pori ogri sma. Suma ben tyari a Frudu dati kon? Yehovah Gado. Luku Tori 15 now. San e pasa drape? Sodom nanga Gomora e kisi pori nanga faya di Yehovah seni kon.

Luku Tori 33 now. Luku san e pasa nanga den asi nanga fetiwagi fu den Egeptesma. Suma ben meki a watra fadon kon na den tapu? Na Yehovah. A ben du disi fu kibri en pipel. Luku Tori 76. Drape yu e si taki Yehovah e pori srefi en eigi pipel, den Israelsma, fu na ogridu fu den ede.

Dati meki wi no musu fruwondru, taki Yehovah sa seni en hemel legre fu tyari wan kaba kon na ala ogri na grontapu. Ma prakseri san dati sa wani taki! Drai a bladzijde opo èn meki wi go luku dati.