KO E HĀ ‘okú ke sio ki ai ‘i hení? ‘Io, ko ha kau tau ‘i he fanga hoosi tea. Ka ke fakatokanga‘i ‘a e feitu‘u ‘oku nau ha‘u mei aí. Ko e fanga hoosí ‘oku nau talua hifo mei hēvani ‘i he ngaahi ‘ao! Ko e mo‘oni ‘oku ‘i ai ha fanga hoosi ‘i hēvani?

‘Ikai, ‘oku ‘ikai ko ha fanga hoosi mo‘oni ‘eni ia. ‘Oku tau ‘ilo ‘ení koe‘uhi he ‘oku ‘ikai lava ‘a e fanga hoosí ‘o lele ‘i he ngaahi ‘aó, ‘ikai ko ia? Ka ‘oku lave ‘a e Tohitapú ki he fanga hoosi ‘i hēvani. ‘Okú ke ‘ilo pe ko e hā ‘oku lave ai ki aí?

Koe‘uhi ‘i he taimi ‘e taha na‘e ngāuelahi‘aki ‘a e fanga hoosí ki he fai ‘o e ngaahi taú. Ko ia ‘oku lave ‘a e Tohitapú ki he kau heka hoosi ‘oku ‘alu hifo mei hēvani ke fakahā ‘oku ‘i ai ‘a e tau ‘a e ‘Otuá ‘e fai mo e kakai ‘o e māmaní. ‘Okú ke ‘ilo ‘a e hingoa ‘o e feitu‘u ‘o e tau ko ‘ení? Ko ‘Āmaketone. Ko e tau ko ia ke faka‘auha ‘a e kovi hono kotoa pē ‘i he māmaní.

Ko Sīsū ‘a e Tokotaha te ne taki ‘a e tau ko ‘eni ‘i ‘Āmaketoné. Manatu‘i, ko Sīsū ‘a e tokotaha na‘e fili ‘e Sihova ke tu‘i ‘i He‘ene founga-pulé. Ko e ‘uhinga ia ‘oku ‘ai ai ‘e Sīsū ‘a e kalauni ‘o ha tu‘í. Pea ko e heletaá ‘okú ne fakahā te ne tāmate‘i ‘a e ngaahi fili kotoa pē ‘o e ‘Otuá. ‘Oku totonu ke tau ofo ‘i hano faka‘auha ‘e he ‘Otuá ‘a e kakai kovi kotoa pē?

Toe sio ange ki he Talanoa 10. Ko e hā ‘okú ke sio ‘i aí? ‘Io, ko e fu‘u Lōmaki na‘á ne faka‘auha ‘a e kakai koví. Ko hai na‘á ne ‘omai ‘a e Lōmakí? Ko Sihova ko e ‘Otuá. Sio ange ki he Talanoa 15. Ko e hā ‘a e me‘a na‘e hoko aí? Na‘e faka‘auha ‘a Sōtoma mo Komola ‘aki ‘a e afi na‘e ‘omai ‘e Sihova.

Huke ki he Talanoa 33. Sio ki he me‘a na‘e hoko ki he fanga hoosi mo e ngaahi saliote tau ‘a e kau ‘Isipité. Ko hai na‘á ne ‘ai ‘a e vaí ke ne have‘i kinautolú? Ko Sihova. Na‘á ne fai ia ke malu‘i ‘ene kakaí. Sio ki he Talanoa 76. Te ke sio ai na‘a mo e kakai ‘a Sihová, ‘a e kau ‘Isilelí, na‘á ne tuku ke faka‘auha kinautolu koe‘uhi ko ‘enau fai koví.

Ko ia ai, ‘oku totonu ke ‘oua te tau ofo ‘i hano ‘omai ‘e Sihova ‘a ‘ene kau tau fakahēvaní ke fakangata ‘a e kovi kotoa pē ‘i he māmaní. Ka ke fakakaukau ange pe ki he me‘a ‘e hokó! Huke‘i mai ‘a e peesí ke tau sio angé.