¿JASA waxa wila il? Jun nole sakal kawuʼik. ¡Pe kʼela bʼa jakumeʼa! ¡Koʼumekon ajnel bʼa satkʼinal yojol ja asoniki! ¿Ay maʼ kawujik ja bʼa satkʼinali?

Meyuk, ja it mi meran kawuʼuke. Wa xnaʼatik yujni ja kawujiki mi xbʼobʼ ajnuke ja bʼa asoni, ¿anke meran? Pe ja Biblia wa staʼa tiʼal kawujik bʼa satkʼinal. ¿Wan maʼ xa naʼa jas yuj?

Yujni ajyi jun tyempo ja kawujiki jel x-aji makunuke ja bʼa kʼakʼaneliki, ja yuj ja Biblia wa xyala jujuntik winik koʼumekon ja bʼa skawuʼeʼi bʼa satkʼinal bʼa oj sjeʼe ja Dyosi ayiʼoj jun skʼakʼanel sbʼaja ixuk winik mi lekuke bʼa Luʼumi. Ja kʼakʼanel it sbʼiʼil Armagedón. Ojni xchʼaysnajel spetsanil ja jastik mi lekuk ja bʼa Luʼumi.

Yeʼnani ja Jesús ja maʼ oj skʼel ja kʼakʼanel it bʼa Armagedón. Ajuluk akʼujol, ja Jyoba stsaʼa ja Jesús bʼa oj och mandaranum ja bʼa sGobyernoʼi, ja yuj ja Jesús slapunej jun skorona ja bʼa yolomi soka espada yamanyuji wa sjeʼa oj smil yibʼanal ja skontraʼik ja Dyosi. ¿Cham maʼ oj kabʼtik ja Dyos oj xchʼay-el snajel yibʼanal ja matik wa skʼulan ja bʼa mi lekuki?

Leʼa ja loʼil 10. ¿Jasa waxa wila? Jaʼa niwan Bʼutʼ Jaʼi ja xchʼaya snajel spetsanil ja ixuk winik mi lekukeʼi. ¿Machʼa yiʼajan ja niwan Bʼutʼ Jaʼ it? Jaʼa Jyoba. Ja weʼgo leʼa ja loʼil 15. ¿Jasa wan ekʼel ja tiw? Jyoba wan xchʼayjel snajel sok kʼakʼ ja chonabʼik Sodoma soka Gomorra.

Ja weʼgo leʼa ja loʼil 33. Kʼela ja jas wan ekʼel sbʼaje ja kawuʼik soka skarretaʼik bʼa kʼakʼanel ja swinkil Egipto. ¿Machʼa skʼulan akoʼ sbʼaje ja slam jaʼi? Yeʼna Jyoba. Skʼulan bʼa oj skoltay ja xchonabʼi. Ja weʼgo kaʼax bʼa loʼil 36 sok 76, ja tiw oj awil jastal ja Jyoba yaʼakan ja israʼelenyoʼiki soka chonabʼi aʼajuk chʼayuk snajel yuja wa skʼulane ja bʼa mi lekuki.

Ja yujil mini chamyabʼjel oj kabʼtik yajni Jyoba sjekakon ja skʼakʼanumik bʼa satkʼinal bʼa oj chʼak xchʼaysnajel yibʼanal ja jastik mi lekuk ja bʼa Luʼumi. Tsaʼan, ¿jasa oj ekʼuk? Aʼekʼuk ja slam jawa juʼuni sok la kiltik.