KASI ukuwonaci apa? Nadi, pali ŵasilikari awo ŵakwera pa ŵakavalo ŵatuŵa. Kweni woneseska uko ŵakavalo (mahaci) aŵa ŵakufuma. Ŵakavalo ŵanandi ŵakukhira kufuma kucanya na kuphorota mu mabingu! Kweni kasi kucanya kuli nadi ŵakavalo?

Yayi, aŵa mbakavalo nadi yayi. Ici nchifukwa cakuti ŵakavalo ŵangenda pa mabingu yayi, asi nthena? Kweni Baibolo likuyowoya za ŵakavalo kucanya. Kasi ukumanya cifukwa ico likuyowoyera nthena?

Cifukwa cake nchakuti kale ŵakavalo ŵakagwiliskirikanga nchito comene pakulwa nkhondo. Mwantheura, para Baibolo likuyowoya za ŵanthu kuti ŵakwera pa ŵakavalo kufuma kucanya, likung’anamura kuti Ciuta wacitenge nkhondo na ŵanthu pano pa caru capasi. Kasi ukumanya zina la nkhondo iyi? Ni Haramagedoni. Nkhondo iyi yizamuwuskapo uheni wose pano pa caru capasi.

Yesu ndiyo wazamudangilira pakulwa nkhondo iyi pa Haramagedoni. Kumbukira kuti Yesu wali kusankhika na Yehova kuŵa fumu ya boma Lake. Ndico cifukwa Yesu wakuvwara cisoti ca ufumu. Ndipo lupanga ilo wali nalo likulongora kuti wazamukoma ŵalwani wose ŵa Ciuta. Kasi tingazizwa kuti Ciuta wazamuparanya ŵanthu wose ŵaheni?

Jura pa Nkhani Nambara 10. Kasi ukuwonaci apa? Ici ni Cigumula cikuru ico cikakoma ŵanthu ŵaheni. Kasi ni njani wakacitiska Cigumula ici? Ni Yehova Ciuta. Sono jura pa Nkhani Nambara 15. Nchivici cikucitika apa? Misumba ya Sodomu na Gomora yikupya na moto uwo Yehova wakatuma.

Jura Nkhani Nambara 33. Wona ico cikucitikira ŵakavalo na ngolo zakucitira nkhondo za Ŵaegupto. Kasi ni njani wakacitiska maji kubizga ŵanthu? Ni Yehova. Wakacita nthena kuti waponoske ŵanthu ŵake. Wona Nkhani Nambara 76. Apa ukuwona kuti Yehova wakazomerezga kuti nanga ŵangaŵa ŵanthu ŵake, Ŵaisrayeli, ŵaparanyike cifukwa ca uheni uwo ŵakacitanga.

Antheura, tingazizwanga yayi kuti Yehova wazamutuma ŵasilikari ŵake ŵakucanya kuti ŵazakawuskepo uheni pano pa caru capasi. Ghanaghanira waka umo vinthu vizamuŵira! Jura peji lakulondezgapo kuti tiwone ivyo vilipo.