МЫНДА чүнү көрүп тур сен? Шын-дыр — ак аъттыг шериглерни. Ынчалза-даа кичээнгейлиг көрем — олар кайыын халдып орар-дыр. Дээрден, булуттар кырлап! Дээрде аъттар чурттап турар чүве бе?

Чок, ынчангаш-ла ол анаа эвес аъттар. Анаа аъттар булуттар кырынга чортуп шыдаар эвес? Ынчалзажок Библияда дээрде аъттар дугайында чугаалап турар. Чүге ындыг, билир сен бе?

Чүге дээрге шаанда аъттарны тулчуушкуннарга ажыглап турган. Бурган черниң чурттакчыларынга удур тулчур деп турарын көргүзер дээш, дээрден халдып орар аъттыг шериглер дугайында Библияда чугаалаан. Ол дайынның болур черин чүү дээр, билир сен бе? Армагеддо́н дээр. Ол дайынга черде бар бүгү каржы чүүл узуткаттынар.

Армагеддо́нга болур дайынны Иисус башкарар. Сактып келем — Иегова Иисусту Бодунуң чазааның хааны кылдыр шилип алган. Ынчангаш Иисустуң бажында хаан короназы бар. А селемези Бурганның шупту дайзыннарын ол узуткаар деп көргүзүп турар. Ынчаарга Бурган шупту каржы кижилерни узуткап кааптар дээрге, сеңээ бүзүренчиг-дир бе?

10-гу чугааны көрем. Ында чүнү көрүп тур сен? Шын-дыр — бүгү делегей чергелиг суг халавы каржы кижилерни узуткап тур. Кым ол суг халавын кылганыл? Иегова Бурган. Ам 15-ки чугааже көрем. Ында чүнү көрүп тур сен? Иеговадан от Содо́м биле Гомо́рраны узуткап тур.

Ам 33-кү чугааже көрем. Еги́петчилерниң аъттары болгаш дайынчы тергелери-биле чүү болуп тур. Кым оларже сугну төп бадырыпканыл? Иегова. Ынчалдыр ол бодунуң чонун камгалап турар. 76-гы чугааже көрем. Каржы херектери дээш, безин бодунуң чону — изра́ильчилер — узуткаттынган болурун Иегова чөпшээрээнин оон көөр сен.

Ынчангаш Иегова бодунуң дээрде шериин чоруткаш, черде бүгү каржы чорукту узуткаар дээнинге элдепсинген херээ чок. Ынчаарга чүгле бодап көр даан — ол бүгүнүң утказын! Арынны аңдара ажыт, ынчан билип алыр бис.