Ni vhona mini afha? Ee, mmbi ya dzibere tshena. Fhedzi sedzesani hune dza bva hone. Dzibere dzi khou gada dzi tshi bva ṱaḓulu kha makole! Naa vhukuma hu na dzibere ṱaḓulu?

Hai, idzi a si bere dza vhukuma. Ri ḓivha izwi ngauri dzibere a dzi koni u gidima kha makole, dzi a kona? Fhedzi Bivhili i a amba nga dzibere dzi ṱaḓulu. Ni a ḓivha uri ndi ngani?

Ndi ngauri bere dzo vhuya dza shumiswa kha u lwa dzinndwa. Ngauralo Bivhili i amba nga vhathu vho ṋamelaho dzibere vha tshi bva ṱaḓulu u sumbedza uri Mudzimu u na nndwa ya u lwa na vhathu kha ḽifhasi. Ni a ḓivha uri fhethu ha nndwa iyi hu vhidzwa mini? Haramagedo. Nndwa iyo i ḓo fhelisa vhuvhi kha ḽifhasi.

Yesu ndi Ene ane a ḓo ranga phanḓa kha u lwa iyi nndwa Haramagedo. Humbulani, Yesu ndi ene we Yehova a mu nanga u vha khosi ya hulumeni Wawe. Ndi nga hone Yesu o ambara muṅadzi wa khosi. Banga ḽi sumbedza uri u ḓo vhulaha maswina a Mudzimu. Naa ri fanela u mangala uri Mudzimu u ḓo fhelisa vhathu vhavhi?

Sedzani murahu kha Mafhungo a 10. Ni vhona mini henefho? Ee, Maḓi Mahulu o fhelisaho vhavhi. Ndi Yehova o itaho Maḓi Mahulu. Zwino sedzani Mafhungo a 15. Hu khou iteani henefho? Sodoma na Gomora i khou fheliswa nga mulilo we Yehova a u ruma.

Vulani Mafhungo a 33. Vhonani zwine zwa khou itea kha dzibere na dzigoloi dza nndwa dza Vhaegipita. Ndi nnyi o itaho uri maḓi a vha wele? Ndi Yehova. O itela u tsireledza vhathu vhawe. Sedzani Mafhungo a 76. Ni ḓo vhona henefho uri Yehova o litsha na Vhaisiraele uri vha fheliswe nga vhuvhi havho.

Zwino-ha, a ro ngo fanela u mangadzwa nga uri Yehova u ḓo ruma mmbi dzawe dza ṱaḓulu a fhelisa vhuvhi hoṱhe. Fhedzi edzanu humbula zwine izwo zwa ḓo amba! Vulani siaṱari ri vhone.

Ndzumbululo 16:16; 19:11-16.