Tantara 114

Faran’ny Raha Ratsy Jiaby

INO raha hitanao iô? Maramila maro mitenginy sevaly malandy. Zahava amy zay tany navian-drô. Sevaly aby io milomoay boaka an-dan̈itry! An-dan̈itry an̈y ma misy sevaly koa?

Irô io tsy sevaly ankitin̈y. Sevaly tsy mahavita milomoay amy lan̈itry an̈y, sa karakôry? Baiboly fo mikoran̈a maomba sevaly an-dan̈itry an̈y. Hainao ino antony?

Fôtony taloha tan̈y, sevaly findesin̈y miady. Ke Baiboly mivolan̈a fa misy olo maro mitenginy sevaly boaka an-dan̈itry, ivolan̈ana fa Zan̈ahary hiady amin’olo ambony tany. Hainao an̈aran̈a tany an̈anaovan̈a ady io? Hara-magedona. Izio ady an̈adosoan̈a raha ratsy jiaby ambony tany.

Jesosy Mpitariky amin’ady Hara-magedona io. Tsiaronao, Jesosy araiky nifidin’i Jehovah hatao ampanjaka amy Fanjakan̈anany. Zen̈y mahavy Jesosy man̈ano satrok’ampanjaka io. Dikan’epe io, izy hamono fahavalon’ny Zan̈ahary jiaby. Tôkony hahagaga atsika Zan̈ahary hamono olo ratsy fan̈ahy jiaby zen̈y?

Zahava baka Tantara 10. Ino raha hitanao iô? Safodrano namono olo ratsy fan̈ahy jiaby. Azôvy nan̈ano Safodrano in̈y? Zan̈ahary Jehovah. Zahava koa Tantara 15. Nisy nino tiô? Jehovah nandefa môtro nandravan̈a tanàna Sodoma ndreky Gomora.

Avadiha amy Tantara 33 bokinao. Zahava raha nahazo sevaly ndreky saretin’Ejipsianin̈y findesin̈y miady aby io. Azôvy nampadobo irô tan̈aty rano tao? Jehovah. Izy nan̈ano zen̈y, hamonjian̈a olonany. Zahava Tantara 76. Hitanao iô fa nata Israelita aby io fa olon’i Jehovah, mbala nisaziny fo, koa nan̈ano raha tsy mety.

Ke atsika tsy tôkony gaga lera Jehovah mandefa maramilanany boaka an-dan̈itry an̈y, han̈adoso raha ratsy jiaby ambony tany ty. Tsaraova fo dikan’izen̈y! Avadiha boky, atsika hizaha zen̈y.

Apokalypsy 16:16; 19:11-16.