ANA akuciwona cici apano? Likuga lya asilikali ali pa mahaci geswela. Nambo alole kugakutyocela. Mahaciga gakuwutuka kwamnope m’mawunde kutyocela kwinani! Ana yisyene kwinani kwana mahaci?

Iyayi, gelega ngaŵa mahaci gasyesyene. Tukumanyilila yeleyi ligongo mahaci ngaŵa mkuwutuka m’mawunde, ngati m’yoyo? Nambo Baibulo jikusasala ya mahaci gagali kwinani. Ana akumanyilila ligongo lyakwe jikusasala yeleyi?

Lili ligongo lyakuti kalakala mahaci ŵagakamulicisyaga masengo mnope pangondo. M’yoyo Baibulo jikusasala ya ŵandu ŵakwela mahaci ali mkutyocela kwinani pakusaka kulosya kuti Mlungu capute ngondo ni ŵandu pacilambo capasi. Ana akumanyilila lina lya malo gakuputila ngondoji? Alamagedo. Ngondoji jicimasya yakusakala yosope ya pacilambo capasi.

Yesu cacilongolela pakuputa ngondoji pa Alamagedo. Akumbucile kuti Yesu ali mundu jwele Yehofa ŵamsagwile kuti aŵe mwenye jwa boma Jakwe. Ni ligongo lyakwe Yesu awete cisoti ca ucimwene. Soni upangawo ukulosya kuti caciwulaga acimmagongo wosope ŵa Mlungu. Ana tusimonjeje kuti Mlungu cacijonanga ŵandu wosope ŵakusakala?

Alolesoni Ngani 10. Ana akuciwona cici? Cikumba cekulungwa cacawuleje ŵandu ŵakusakala. Nduni juŵatendekasisye cikumbaci? Yehofa Mlungu. Sambano alole Ngani 15. Cici cacikutendekwa pelepo? Yehofa atumisye moto wawukonanga Sodomu ni Gomola.

Awunukule Ngani 33. Alole yayikugatendecela mahaci ni yigudumu ya Aeguputo. Ana nduni juŵatendekasisye kuti mesi gayice nikwawulaga wosopewo? Yehofa. Jwalakwe ŵatesile yeleyi pakusaka kwateteya ŵandu ŵakwe. Sambano alole Ngani 76. Cayiwone kuti pelepo Yehofa ŵakundile kuti ŵandu ŵakwe, Ayisalayeli, ajonasice ligongo lya kusakala kwawo.

M’yoyo tukasimongaga kuti Yehofa cacitumisya makuga gakwe gakwinani ga asilikali kuti gamasye yakusakala yosope pacilambo capasi. Nambo agambe ganisya mwayiciŵela yindu! Awunukule kusyeto kuti alole.