Ra guiluxe guiráʼ guendaquéiquiiñeʼ
Historia 114
Ra guiluxe guiráʼ guendaquéiquiiñeʼ
XI ruuyuʼ lu dibuju riʼ. Stale binni dxiʼbaʼ caballu quichiʼ. Peru biiyaʼ de paraa zeedacame. ¡Ca caballu ca zeeda guxooñecaʼ de guibáʼ lade ca za ca! Ñee nuu caballu guibáʼ la?
Coʼ, cani cahuinni raríʼ cadi dxandíʼ caballu diʼ laacaʼ. Nánnanu ni purtiʼ ca caballu ca qué zanda guxooñecame lade za, cadi dxandíʼ la? Peru Biblia ruzeeteʼ de caadxi caballu guibáʼ. Nannuʼ xiñee la?
Purtiʼ dxiqué biquiiñecabe caballu ora chitíndecabe lu guerra. Nga runi, Biblia riníʼ de que tuudxi binni riete de guibáʼ dxíʼbacaʼ caballu ti guluiʼcaʼ de que Dios napa ti guerra para guiráʼ binni de Guidxilayú. Paraa chigaca ndiʼ yaʼ. Lu Armagedón, ne zunitilube ca guendaquéiquiiñeʼ nuu lu Guidxilayú riʼ.
Jesús Nga chisániruʼ lu guendaridinde ni chigaca lu Armagedón riʼ. Bietenalaʼdxiʼ, Jiobá gulí Jesús para gaca rey stiʼ gobiernu Stibe. Pur nga runi, ique Jesús nga nuu corona ca. Ne espada ca rusihuinni de que chiguutibe guiráʼ ca xhenemigu Dios. Ñee guendaridxagayaa nga gánnanu de que Dios chiguuti ca binni malu ca la?
Biyubi Historia 10. Xi ruuyuʼ luni. Nisaguié naroʼbaʼ ni biiti guiráʼ binni malu que, njaʼ. Tu bisaba Nisaguié naroʼbaʼ ca yaʼ. Jiobá Dios. Yanna biiyaʼ lu Historia 15 ca. Xi cayaca luni. Jiobá cuzaaquiʼ Sodoma ne Gomorra.
Gudiʼdiʼ lu Historia 33. Biiyaʼ xi cayaca ca caballu ne ca carru ni ritindené ca egipciu ca. Tu bisaba nisa ca luguiácabe yaʼ. Jiobá. Bíʼnibe ni para gulabe xquídxibe. Biyubi Historia 76. Racá zuuyuʼ de que Jiobá dede bidii lugar guinitilú xquidxi purtiʼ gúcacaʼ malu.
Nga runi, qué zadxagayaadinu ora Jiobá guseenda dede guibáʼ ca binni nanda guiibaʼ stiʼ para gunduuxeʼ guiráʼ ca guendaquéiquiiñeʼ nuu lu Guidxilayú riʼ. Xi chigaca despué yaʼ. Bitiixhi sti yaza ca ne gúʼyanu xi raca.
