TALA kama mitondo ayi yisuku-yisuku, ni yitemo yipema ni milundu yinene-yinene. Chihela chino chili chipema, nyi ngwami? Tala kayi kanalila ha kwoko lia kanuke au. Nawa tala ndumba ni tuvwalu anamana ha mwambu auze. Yena unazange kutwama mu chimwe chihela ngwe achi?

Zambi kanazange hanga yena utwame miaka yeswe hano hashi, mu paraisu. Nawa iye kaso kuzanga hanga yena uyize ngwe chize atu anayiza musono. Yenayino Mbimbiliya yinalakenya kuli waze makatwama mu paraisu yaha, ngwo: ‘Zambi makapwa hamwe no. Kufwa, mbimbi, chipwe yikola kuyichi kapwako nawa. Yuma yikulu muyikahwa.’

Yesu makasela ushindakenyo hanga yuma yacho yipema yikapwe hano hashi. Yena unanyingika shimbu lika? Chochene, muze iye mahwisa upi ni atu api eswe hano hashi. Euluka ngwo, muze Yesu apwile hano hashi, iye te kakuwuka atu waze te akwete yikola yamutapu weswe, nawa kanakahindwisa atu mu ufwe. Yesu kanakalinga yuma yino hanga asolole yize iye makalinga hano hashi, muze meza ngwe Mwanangana mu wanangana wa Zambi.

Nyonga kama chiseke hakupwa mu paraisu yaha hano hashi! Yesu hamuwika ni amwe atu akusakula, mayula mu malilu. Akwa kuyula jacho makafunga atu eswe hano hashi, hanga akapwe ni uwahililo. Tutalenu yize chatamba kulinga mba Zambi atwehe mwono wa mutolo mu paraisu yenyi yaha.