HI thingkung sangpipi, aa dawh ngai mi pangpar le tlang sangpipi hi zoh hmanh u. An i dawh ngai lo maw? Sazuk pakhat cu ngakchiapa kut chung in rawl a ei lengmang mi hi zoh tuah u. Cun chindeih hna le rangtum hna ramhring lak i an dir mi zong hi zoh hmanh u. Hi bantuk hmun i, inn chung ah um cu nan duh hnga lo maw?

Pathian nih vawlei cung paradis chung ah zungzal in nung hna seh ti an duh hna. Cun nihin i minung nih an in lengmang mi zawtnak le fahnak hmuh cu an duhpiak hna lo. Paradis thar chung ah a nung hnga mi hna sin ah Baibal nih bia a kam mi hna cu: ‘Pathian cu an sin ah a um lai. Thihnak le ṭahnak a um ti lai lo. Thil hlun vialte cu a kal dih cang,’ ti a si.

Hi khuaruahhar thlennak cu Jesuh nih a chuahter lai. Zeitikahdah a si lai nan hngal maw? A si, ṭhatlonak vialte le mi ṭhalo vialte vawlei in a thenh dih hnu ah a si lai. Jesuh vawlei cung i a um lio ah zawtnak phunkip a ngei mi hna kha a damter hna i, mithi hmanh a rak thawhter hna. Pathian pennak siangpahrang a si tik ah vawlei cung dihlak ah a tuah te lai mi hmuhsaknak ah cu hna cu a rak tuah mi a si.

Vawlei i paradis thar chung ahcun zeitluk in dah a nuamh te hnga ruat tuah u! Jesuh nih a thim mi hna he vancung in vawlei kha an uk lai. Hi uktu hna nih vawlei mi vialte kha lunglawmhnak an hmuh nak hnga an zohkhenh hna lai. Pathian nih a paradis thar chung ah zungzal nunnak pel lo in a kan pek nak hnga zeidah kan tuah a herh ti mi zoh tuah u sih.