HANAWANG cahu itre isinöe ka tru, memine la itre iengene ka mingöming, me itre wetr ka draië catr. Hapeu, thaa itre ewekë kö lai nyine emingömingön la mele së? Goeëne cahu kola xeni hnene la neköi drië, ngöne la ihnatrapaime ne la nekönatr. Nge goeëne ju fe la itre liona me itre hoos, kola ce xeni ngöne la hnapapa. Ajane fe kö nyipunie troa hane mele ngöne la ketre götrane ka tune lai?

Kola ajan hnei Akötresie tro nyipunie a mele epine palua, e celë fen ngöne la paradraiso. Ngo thaa ajane kö Nyidrëti tro nyipunie a mele hnine la kucakuca me akötr, itre ewekë ka ahlehleun la mele ne la atr enehila. Celë hi hna thingehnaeane lai hnei Tusi Hmitrötr, kowe la itre atr ka troa mele elany ngöne la paradraiso ka hnyipixe kola hape: ‘Tro hë Akötresie a ce me angatr. Thaa tro hmaca kö a meci hnene la atr, maine treij, maine akötre pena. Paatre tro hë lo itre ewekë hnapan.’

Tro Iesu a kuca matre troa saze me lolo la fen. Atre hi nyipunie la ijine troa traqa la itre hna thingehnaean celë? Itre ej a troa traqa thupene la hnei nyidrë hna nyihnyawan la ihnadro, me apaatren la nöjei ngazo asë, memine la itre atr ka ngazo. Pane mekune jë, ame ngöne lo Iesu e celë fen, hnei nyidrëti hna aloin la meci ne la itre atr, me amelene hmaca la itre ka mec. Nöjei ewekë lo lai hnei Iesu hna kuca, matre troa nyiqaane amaman la itre nyine tro nyidrëti a kuca elany e celë fene hnengödrai asë, ngöne la nyidrëti a troa cilën la hna nyi Joxu ne baselaia i Akötresie.

Ketre pengöne kö elany la elolon la mel, ngöne la paradraiso ka hnyipixe e celë fen! Iesu memine la itre hnei nyidrë hna iën, a troa mus qaa koho hnengödrai. Troa thupëne hnei angatr, matre troa mele ka loi la nöjei atr ka troa mele pe e celë fen. Tro pe sa ce wang la ewekë ka sisitria nyine tro sa kuca, matre ijiji së fe troa kapa qaathei Akötresie la mele ka thaa ase palua kö, ngöne la paradraiso i Nyidrë ka hnyipixe.