RAICA mada na veivunikau babalavu, na veisenikau totoka, kei na veiulunivanua cecere. Sa rairai vinaka dina, se vakacava? Raica mada na dia oqori e kana tiko mai na ligana na gonetagane lailai. Raici ira na laione kei na ose era tu ena vanua veico. O vinakata me dua na nomu vale ena vanua oqo?

E vinakata na Kalou mo bula tawamudu ena vuravura parataisi. E sega ni vinakata mo rarawa se vutugu tiko me vaka ga e yacovi keda tu nikua. Oqo na ka e yalataki tu ena iVolatabu vei ira era na bula ena parataisi vou: ‘Na Kalou ena tiko kei ira. Ena sega tale na mate, na tagi, se na vutugu. Sa na takali na ka makawa.’

Ena raica o Jisu me yaco sara ga na veisau totoka oqo. O kila se na yaco ni naica? Io, ni sa na oti vakadua na ivakarau ca kei ira na tamata ca era tiko e vuravura. Ke o raica lesu na bula i Jisu e vuravura, a vakabula e so o koya mai na kedra mate, bau vakaturi tale ga na tamata sa mate tu. A cakava oqo o Jisu me vakaraitaka kina na veika ena qai cakava ni sa na Tui ni Matanitu ni Kalou.

Vakasamataka mada na totoka ni paraitaisi vou e vuravura! Sa na veiliutaki tiko mai lomalagi o Jisu kei ira sa digitaka o koya. Era na qai qaravi ira kece mai na lewe i vuravura, mera bula marau tiko ga. Meda raica mada na veika meda cakava me na qai vakadonuya kina na Kalou meda bula tawamudu ena nona parataisi vou.