PIIRAKAA sümüin tü wunuʼuliakalüirua, tü süsiikat wunuʼu otta tü uuchikalüirua. Anasü maʼin, ¿aashimüin? Piirakaa nümüin chi wüyala nikirakai chi jintüikai, na wasashikana otta na amakana. ¿Pücheküin kepiain pia suluʼu wanee piichi otta wanee mma eeka müin aka saaʼin tüü?

Kateesü poʼu waneepia nutuma Maleiwa suluʼu tü paraiisükat sümaa nnojoluin müliain pia. Müsü tü Wiwüliakat namüin na kepiainjanakana suluʼu: ‹Eeshi Maleiwa namaa. Müiria nnojoluin ouktaa, mojuu aaʼin jee aʼyalajaa süka sülatüipain süpüshuaʼa tia›.

Nia Jesús ekeraajirüinjachika tia. ¿Pütüjaa aaʼu joujainjatüin shia? Najaʼttirapa süpüshuaʼa tü kasa mojusükat otta na mojulaashiikana. Soto paaʼin wanaa sümaa yaajachin Jesús Mmapaʼa, niiyajüin na ayuuishiikana otta nüsoʼireʼerüin naaʼin na ouktushiikana. Niiʼiyatüin süka tia, tü naainjüinjatkat nuluwataapa saaʼu tü Mmakat.

¡Aneerü maʼin kepiaa suluʼu tü Paraiisükat! Aluwataainjachi Jesús sirumatuʼu namaa wanee wayuuinnua. Jülüjüinjatü naaʼin tü kasa eekat Mmapaʼa süpüla talatüinjanain waya. Wekirajaa sünain tü waainjüinjatkat süpüla katüin woʼu waneepia suluʼu tü paraiisü jeketkat.