Kukwe kira 115

Kä mrä bä nuäre kä tibienbätä

KRI krikri, kri blü bä nuäre bätä ngutuä mente kwin mike ñärärä. Bä nuäre, ¿ñan ererea? Mike ñärärä, bura ngäbä tuin mröre monso chi kisete. Aune lion bätä mädä tuin yete mikäbiti. ¿Mä törba nünain ju ne kwrere o kä ne kwrere känti?

Ngöbö tö mä tuai nüne kärekäre Kä tibienbätä kä bä nuäre te, aune nitre tä ja tarenike nengwane ye erere mä ñaka rabadrera ja tarenike jire. Nitre käkwe nünain kä bä nuäre mrä yete ie Biblia tä ye käbämike. ‘Ngöbö täi nitre yebe. Gata, ja müai aune ja tarenika ñaka rabaira jire. Jondron kira ye näin jökrä ta.’

Jesús jondron ne mikai nemen bare. ¿Ñongwane gare mäi? Jän, kukwe käme jökrä bätä nitre käme jökrä mikai krüte Kä tibienbätä ye bitikäre. Ngwen törö jai, Jesús nämene kä tibienbätä ye ngwane nitre mikaninta kwin kwe bren jökrä kisete, aune nitre krütani ganinkröta kwe. Niara rabai Reire gobran Ngöbökwe yete ye ngwane dre nuaindi kwe ye bämikani kwe.

¡Nünain kwin krubäte kä mrä bä nuäre yete ye mä bämika ja töibätä! Jesús, bätä nitre diankata ruäre kwe ye käkwe gobrandi kä kwinbiti. Nitre Kä tibienbätä ye jökrä ngübadi kwe aune jökrä mikai nüne kä jutobiti kwe. Nikwe dre nuaindre ne kwe Ngöbökwe ja nire käre biandre nie nünankäre kä mrä bä nuäre yete ye ani mike gare jai.

Revelación 21:3, 4; 5:9, 10; 14:1-3.