SAʼ LI naʼaj aʼin wank ninqi cheʼ, uutzʼuʼuj ut ninqi tzuul. Kʼajoʼ xchʼinaʼusal li naʼaj! Kʼe reetal li chʼina kej yook chi waʼak saʼ ruqʼ li chʼinaʼal. Ebʼ li kaqkoj ut li kawaay xaqxookebʼ saʼ li pachʼayaʼ. Ma taawulaq raj chaawu wank saʼ li naʼajej aʼin?

Li Yos naraj naq twanq aayuʼam chi junelik saʼ li Ruuchichʼochʼ, bʼarwiʼ maakʼaʼaq chik li rahilal. Li Santil Hu naxyeechiʼi aʼin rehebʼ li teʼwanq saʼ li Sahilal Naʼajej: ‹Li Yos twanq rikʼinebʼ. Maakʼaʼaq chik li kamk, li yaabʼak chi moko li rahilal›.

Li Jesus t-isinq re chixjunil aʼin. Abʼan, ma nakaanaw joqʼe tkʼulmanq aʼin? Naq ak risi chik chixjunil li maaʼusilal ut ebʼ li maaʼusebʼ xnaʼlebʼ saʼ li Ruuchichʼochʼ. Maare jultik aawe naq li Jesus kiwank saʼ li Ruuchichʼochʼ kixkʼirtasi chixjunilebʼ li yaj ut kiwaklesink kamenaq. Chi joʼkan kixkʼutbʼesi kʼaru tixbʼaanu saʼ xbʼeen li Ruuchichʼochʼ naq t-awabʼejinq saʼ li Xʼawabʼejilal li Yos.

Kʼajoʼaq xchʼinaʼusal wank saʼ li akʼ Ruuchichʼochʼ! Li Jesus kixsikʼ jun chʼuut chi poyanam re naq teʼawabʼejinq rochbʼeen saʼ choxa. Teʼxtenqʼa ut teʼril chixjunil li wank xyuʼam saʼ xbʼeen li Ruuchichʼochʼ. Ut teʼxbʼaanu naq chixjunilebʼ sahaqebʼ saʼ xchʼool. Anaqwan qatzolaq kʼaru tento tqabʼaanu re naq li Yos tixkʼe qayuʼam chi junelik saʼ li akʼ Ruuchichʼochʼ.