LTALA banti yai ya nene, bintuntu ya kitoko mpi bangumba ya nda. Mbisi mosi kedya na diboko ya mwana ya bakala. Bankosi melala na mawete yonso na matiti mpi na ntama fyoti, bampunda kedya matiti. Nani tazola ve kuzinga na ndambu ya ntoto ya kitoko bonso yai?

Nzambi kezola nde beto zinga mvula na mvula na ntoto na kati ya paladisu. Yandi kezola kukatula beto na bampasi yina bantu kekutana ti yo ntangu yai. Tala mambu Bible kesila na bantu yina tazinga na paladisu ya mpa: ‘Lufwa tavanda dyaka ve, ata bampasi. Mambu ya ntama taluta mvimba.’

Kubaluka ya mbote mutindu yai tasalama na lusadisu ya Yezu, yina tayantika ntangu yandi takatula bantu ya mbi na ntoto. Ntangu yandi vandaka na ntoto, Yezu belulaka bambefo, mpi futumunaka bafwa. Yau vandaka sambu na kusonga mambu yina yandi tasala na ntoto ya mvimba ntangu yandi tavanda Ntotila ya kimfumu ya Nzambi.

Yau tavanda mbote na kuzinga na paladisu ya mpa na ntoto, na luyalu ya zulu ya Yezu mpi na bayina tayala na yandi kisika mosi na kintotila na yandi! Bamfumu yai tasungimina na byese ya bantu yonso na ntoto. Beto tala ntangu yai nki beto fwete salao sambu Nzambi kupesa beto luzingu ya mvula na mvula na paladisu na yandi ya mpa.