TALA komiti dile, keengala diwa nokeendudu odo dile di li mefano olo! Onhele oyo itai monika tuu nawa! Tala nghee okapundja taka li peke lokamati oko. Tala yo eenghoshi dinya nosho yo eenghambe odo da fikama melundu. Ino hala mbela okukala ho di meumbo li li ponhele ya tya ngaha?

Kalunga okwa li a hala u kale fiyo alushe moparadisa kombada yedu. Ka li a hala ngeno tu kale hatu mono oixuna kouyahame ile komikifi odo tadi hepeke ovanhu kunena. Ombibeli oya udanekela ovo tava ka kala moparadisa tai ti: ‘Kalunga ota ka kala pamwe navo. Efyo itali ka kala po vali ile oluhodi ile ouyahame. Osheshi eshi shotete otashi ka xulifwa po.’

Jesus ota ka fya oshisho opo omalunduluko oo makumwifi a ningwe. Mbela ou shi shii kutya otaa ka ningwa naini? Heeno, omalunduluko a tya ngaho otaa ka etwa konima eshi a xulifa po owii aushe kombada yedu nosho yo ovakolokoshi aveshe. Dimbuluka kutya eshi Jesus a li kombada yedu okwa li a velula omikifi di lili noku lili nokwa li nokuli a nyumuna ovafi. Jesus okwa li a longa oikumwifilonga oyo opo a ulike kutya omalunduluko elipi ta ka eta kombada yedu alishe ngeenge okwa ningi Ohamba youhamba waKalunga.

Itashi ka kala tuu shihafifa oku ka kala moparadisa kombada yedu! Jesus ota ka pangela okudja meulu pamwe novanhu vonhumba ovo a hoolola. Ovo tava ka pangela pamwe naye otava ka fila oshisho ovanhu aveshe kombada yedu nokushilipaleka kutya ova hafa. Natu ka taleni kutya otwa pumbwa okuninga po shike opo tu kale tu na oushili kutya Kalunga ote ke tu pa omwenyo waalushe moparadisa yaye oyo tai ke uya.