ҚАРАШЫ, қандай үлкен ағаштар, қандай ғажап гүлдер және алып таулар. Әдемі ғой, рас па? Бұғының бұзауының балақайдың қолынан жеп жатқанына қарашы. Ал көгалда болса арыстандар жатыр және жылқылар жайылып жүр. Сен де осындай әдемі жерде орналасқан үйде тұрғың келер ме еді?

Құдай сенің жер бетіндегі жұмақта мәңгі өмір сүргеніңді қалайды. Ол бүгінгі күнгі көптеген адамдар сияқты сенің ауырғаныңды қаламайды. Киелі кітап жаңадан орнаған жұмақтың тұрғындарына мынаны уәде етеді: “Құдай олармен бірге болады. Енді ешқашан өлім де, жылау да, ауру да болмайды. Бұрынғы нәрселер өткен”.

Иса осы таңғажайып өзгерістер іске асу үшін қам жейтін болады. Қашан екенін білесің бе? Иә, жер бетін бар зұлымдық пен зұлым адамдардан тазартып болған соң. Иса жер бетінде болған кезінде, қандай ауруларды болмасын жазып, тіпті өлілерді қайта тірілткені есіңде ғой. Ауруларды сауықтырған кезде, Иса Құдай тағайындаған Патша ретінде билік ететін уақытта не істейтінін көрсеткен еді.

Жер бетіндегі жұмақта қандай тамаша жағдайлардың боларын көз алдыңа елестетіп көрші! Иса және ол таңдап алған адамдар көктен билік ететін болады. Бұл билеушілер жер бетінің әрбір тұрғынына қамқорлық көрсетіп, әрі олардың бақытты болуының қамын ойлайтын болады. Ал енді Құдайдың сыйы — жаңадан орнаған жұмақтағы мәңгі өмірді сенімділікпен күту үшін не істеуіміз керек екенін білейік.