AKIMONA bino bichi byalepa, maluba abena kumwekana bulongo ne mitumba yalepa. Nanchi bino bintu kechi bibena kumweka bulongo papo nenyi? Mona kangulungu byo kabena kumyanga mu kuboko kwa uno kalombwana. Kabiji akimona mabokwe ne bambili baimana momwa mwatemba bulongo. Nanchi wakonsha kutemwa kwikala mu nzubo iji mu mpunzha nabiji ino nyi?

Lesa wakeba’mba obewa ukekale myaka ne myaka mu paladisa panopantanda. Kabiji aye kechi ubena kukeba amba ukayandenga na misongo ibena kupitamo bantu lelo jino ne. Uno ye mulaye wa Lesa ku boba bakekalanga mu paladisa mupya amba: ‘Lesa ukekala nabo. Kechi kukekala lufu nangwa kujila nangwa misongo ne. Bintu bya kala byapichijila.’

Yesu ukamona’mba luno lupimpu lwa kukumya, lwafikizhiwa. Nanchi wayuka kino po kikafikizhiwa nyi? Ee, panyuma ya kufumyapo bintu byonse byatama ne bantu babi. Vuluka kuba’mba kimye Yesu kyo ajinga panopantanda wabukile bantu bajinga na bikola byapusana pusana, kabiji wasangwile ne bafu. Yesu waubile bino kumwesha’mba ukoba kino mwaya ntanda yonse kimye kyo akekala Mfumu wa bufumu bwa Lesa.

Akilangulukapotu byo kikawamapo kwikala mu paladisa mupya panopantanda! Yesu pamo ne boba bo asala, bakalaminanga mwiulu. Bano bakalama bakamona kuba’mba bonse panopantanda babena kulamwa bulongo ne kwikala ba lusekelo. Pano twaya tumone byo twafwainwa kuba pa kuba’mba Lesa aketupe bumi bwa myaka ne myaka mu paladisa wanji mupya.