TALA yoi mityi milampe, maluba mayampe ne ngulu milamila. Mwene pano i payampe? Tala mudila kasha mu kuboko kwa mwanuke. Kadi tala bantambo ne bampunda bemene mu lumenya lwa biyombo kokwa. Lelo kusakilepo kushikata mu njibo wikele pa kifuko kidi bwa kino?

Leza ukusakilanga kwikala nyeke pano pa ntanda mu paladisa. Kasakilepo wikale mu misongo ne mu masusu adi na bantu dyalelo. Mulao wa Bible pa mwanda utala bantu bakekala mu paladisa i uno: ‘Leza ukekalanga nabo. Kadi kekukekalapo lufu nansha kudila nansha masusu mene. Bintu bibajinji bibapu.’

Bine, Yesu ukata mutyima wa kwalamuna bino bintu mu muswelo utulumukwa. Lelo uyukile i kitatyi’ka? Eyo, i kupwa kutalula bibi byonso ne bantu babi bonso. Vuluka, pādi Yesu pano pa ntanda wābelwile bantu ba misongo yonso, kadi wāsangwile ne bafwe. Yesu wālongele bino bintu mwanda wa kulombola byakalonga pano pa ntanda ponso pakekala Mulopwe wa bulopwe bwa Leza.

Langa’po bidi mukaneñenena paladisa impya pano pa ntanda! Yesu ne boba batongele, bakaludikilanga mūlu. Bano baludiki bakatanga mutyima ku muntu yense pano pa ntanda ne kutala shi udi na nsangaji. Tutalei kyotufwaninwe kulonga shi tusaka Leza aketupe būmi bwa nyeke mu yandi paladisa impya.