Chihande 115

Palachise Yayihya haMavu

ACHITALE mitondo yayisuku yize yili kuze, najitemo najipili jajisuku. Kutala kaheshi nakusoloka kuwahako nyi? Tala omwo mbala anakulila mulivoko lyakanyike. Tala nawa vandumba natuvalu vaze vanemana mulilambo. Kutala kaweshi kusaka kutwama muzuvo yili hachihela changanako nyi?

Kalunga asaka ukatwame haya myaka yosena mupalachise hano hamavu. Kasakile ove kuyandangila ngana muvali nakuyanda vatu makumbi anoko. Kushika chaMbimbiliya kuvatu navakatwamanga mupalachise chikiko chino: ‘Kalunga mwapwanga navakivo hamwe. Kufwa, chipwe kulila chipwe kukola kavyeshi kukapwako chekako. Mwomwo vyuma vyamwaka vinafumuko lyehi shikaho.’

Yesu mwakawahisa chikupu vyuma. Unatachikiza shimbu navikalingiwa tahi? Eyo, hanyima yakufumisa upi wosena navatu vavapi hamavu. Anuka ngwove, omu Yesu apwile hamavu, ahindwile vatu vamisongo yeka nayeka, nakusangula nawa vafu. Yesu alingile chuma kana mangana asolole mumwakalinga hamavu hosena omu mwakapwa Mwangana wawangana waKalunga.

Achishinganyeke ocho kuwaha kana nachikapwamo mupalachise yayihya hano hamavu! Yesu, hamwe kaha navamwe anakusakula, navakayulanga mwilu. Vamyangana kana navakazakamanga mutu himutu hano hamavu nakuvevwisa kuwaha. Tutalenu kanawa ovyo twatela kulinga numbanyi chikupu Kalunga akatuhane kuyoya chahaya myaka yosena mupalachise yenyi yayihya.

Kusoloka 21:3, 4; 5:9, 10; 14:1-3.