QʼONK twitza kyiʼj tzeʼ nim kyweʼ, kyiʼj tbʼanil bʼech ex kyiʼj qeju nimaq witz. ¿Tzeʼn nela jlu toj twitze? Ax ikx lu jun masat nwaʼn tuj tqʼabʼ jun tal kʼwaʼl. Qʼonk twitza tiʼj chej ex kyiʼj qejo león ateʼku toj kʼul. ¿Taja tuʼn tanqʼina tuj jun tembʼil ik tzaʼn jlu?

Tajbʼil qMan Dios tuʼn tanqʼina te jun majx toj jun tbʼanel najbʼil tzalu twitz Txʼotxʼ, jatumel miʼ tentl kʼixkʼojil ik tzeʼnj nbʼaj jaʼle tuj kyanqʼibʼil xjal. A jlu ntzaj ttziyen Tyol Dios kye qeju che anqʼil tuj akʼaj tbʼanel najbʼil: ‹Ktel Dios kyxol xjal. Ex miʼn tentl kamik ex miʼ tentl oqʼel ex miʼ tentl kʼixkʼoj. Aqeju at tnejel ma che naj›.

Kbʼantel tkyaqil jlu tuʼn Jesús. ¿Ojtzqiʼn tuʼne jtoj bʼant jlu? Ajxe tel bʼaj tkyaqilju mya bʼaʼn twitz Txʼotxʼ tuʼn, ex aj tkubʼ tnajsaʼn tkyaqiljo mya bʼaʼn xjal. Qa naʼnx tuʼne, tej tten Jesús twitz txʼotxʼ kubʼ tqʼanen tkyaqil yabʼil toktaq kyiʼj xjal, ax ikx e jaw itzʼj junjun xjal tuʼn. Iktzun kubʼ tyekʼe Jesúsju, ajo kbʼantel tuʼn twitz tkyaqil Txʼotxʼ aj tok te ajKawil tuj tkawbʼil Dios.

¡Naqpe ximinxe aju tbʼanel qanqʼibʼil ktel tuj akʼaj tbʼanel najbʼil! Kkawil Jesús toj kyaʼj kyukʼex qeju o che jaw tskʼoʼn. Ok tzul kyqʼoʼn tkyaqiljo kʼajbʼel kye xjal twitz tkyaqil txʼotxʼ, ax ikx aʼye che xqʼuqil tuʼn kyten xjal tuj tzalajbʼil. Qo xnaqʼtzal tiʼ kbʼantel quʼn, tuʼntzen ttzaj tqʼoʼn Dios qchwinqlal te jumajx; tuj akʼaj tbʼanel najbʼil te tzalajbʼil.