Zistwar 115

Enn Nouvo Paradi lor Later

GET tou sa bann gran-gran pie-la, sa bann zoli fler ek montagn ot la. Eski sa landrwa-la pa extra zoli? Gete kouma sa serf-la pe manz dan lame sa ti garson-la. Ek get bann lion ek bann seval ki pe deboute dan lerb. Eski to ti pou kontan ena enn lakaz ki trouv dan enn landrwa koumsa?

Bondie anvi ki to viv pou touletan lor later dan enn paradi. Ek Li pa anvi ki to gagn okenn douler ki fer bann dimounn soufer zordi. Ala promes ki Labib fer ar bann ki pou viv dan sa nouvo paradi-la: ‘Bondie pou avek zot. Pou nepli ena lamor, kriye ek douler. Sa bann vie kitsoz-la finn disparet.’

Jésus pou fer sir ki sa bann zoli sanzman-la arive. Eski to kone kan? Se apre ki nepli pou ena bann move kitsoz ek bann move dimounn lor later. To rapel, alor ki Jésus ti lor later li ti geri bann dimounn ki ti ena tou sort kalite maladi, ek li ti mem resisit bann dimounn mor. Jésus ti fer sa pou montre ki li pou fer pou later antie kan li pou vinn Lerwa dan rwayom Bondie.

Mazinn enn kout kouma sa pou extraordiner kan nou pou dan sa nouvo paradi lor later la! Jésus, ansam avek bann ki li’nn swazir, pou regne dan lesiel. Sa bann dirizan-la pou pran kont tou dimounn lor later ek pou veye ki zot ere. Anou gete ki nou bizin fer pou ki nou sir ki Bondie donn nou lavi pou touletan dan so nouvo paradi.

Révélation 21:3, 4; 5:9, 10; 14:1-3.