Tanojnots 115

Se yankuik xochital nikan Taltikpak

XIKITA uejueyi kuoujmej, kualtsitsin xochimej uan uejueyi tepemej. ¿Melauj ika tel kualtsin nejin? Xikita, nejin masat takuajtok imako konet. Uan xikinita tekuanimej uan caballos tein moajsij ixtauat. ¿Tikuelitaskia tinemis kanajika kemej nikan?

Dios kineki xinemi nochipaya nikan Taltikpak itech se xochital, uan amo xikijyouiok tekokojkayot tein taltikpakneminij kipanouaj axkan. Yejua nejin motenkaua Biblia tein kipanoskej akin nemiskej itech yankuik xochital. Kijtoua: ‘Dios yetos imiuan. Amo onkas chokalis, tekokojkayot niono mikilis. Tein achto onkaya panoka’.

Jesús kiitas maj mochiua nochi tein kuali. ¿Tikmati kemanian? Kemaj, satepan keman kijkuanis itech Taltikpak nochi tein amo kuali uan taltikpakneminij tein amo yolkualmej. Xikelnamiki, keman Jesús yetoya nikan Taltikpak kinpajtij kokoyanij, uan no kinajokuik sekin mikemej. Ijkon kinextij tein kichiuaskia semanauak Taltikpak kemej Tekiuaj itech itekiuajyo Dios.

¡Ximonemili keniuj tel kualtsin se nemis itech yankuik xochital! Jesús, uan oksekin tein yej kinijitak, tekiuajtiskej iluikak. Kiitaskej tein kinpolos nochin tein nemiskej nikan Taltikpak, uan no kiitaskej maj nochin yolpakikan. Tikitatij toni moneki tikchiuaskej uan ijkon Dios uelis techmakas nemilis nochipaya itech yankuik xochital.

Apocalipsis 21:3, 4; 5:9, 10; 14:1-3.