TLAPOUALISTLI 115

Se yankuik xochitlali ipan Tlaltikpak

XIKITA kuajmej tlen uejkapantikej, xochimej kuajkualtsitsintin uan tepemej uejueyij. ¿Amo melauak tlakualtsin? Xikita, masatl tlakuajtok itech ima nin chokotsin. Uan xikita leones uan caballos tlen katej ipan xiuitl. ¿Mitspaktiskia tichantis kanin tlakualtsin ijkon ken nikan moita?

ToTajtsin Dios kineki nochipa xiyolto itech Tlaltikpak itech se xochitlali, kanin ayakmo titlajyouis ken axkan tlajyouiaj tlaltikpaktlakamej. Ijkon kijtoa Biblia yetoskej tlaltikpaktlakamej itech yankuik xochitlali. Biblia kijtoa: ‘ToTajtsin Dios yetos imiuan. Ayakmo yetos mikilistli, chokilistli nion tekokojkayotl. Pampa nochi tlen achto okatka yopanok’.

Jesús kichiuas nochi nin tlamantli kuali. ¿Tikmati keman kichiuas? Kema, achto kipojpolos nochi tlen amo kuali uan tlaltikpaktlakamej tlen amo yolkualmej ipan Tlaltikpak. Xikilnamiki, ijkuak Jesús okatka itech Tlaltikpak okinpajti tlaltikpaktlakamej, uan noijki okinyoliti sekimej. Ijkon okiteititi tlen kichiuas itech nochi Tlaltikpak ken ueyi Tekiua itech itekiuajkayo toTajtsin Dios.

¡Ximokuayejyeko ken melauak kuali tiyetoskej itech yankuik xochitlali! Jesús uan sekimej tlen okinpejpenki, tlanauatiskej iuan ye itech iluikak. Kinpaleuiskej nochtin tlen yetoskej ipan Tlaltikpak uan kichiuaskej nochtin ma yolpakikan. Ma tikitakan tlen moneki tikchiuaskej pampa toTajtsin Dios techmakas yolilistli tlen amo keman tlamis itech yankuik xochitlali.

Apocalipsis 21:3, 4; 5:9, 10; 14:1-3.