HYANDI nuyu̱ yä däta zaa, nuyu̱ yä zi do̱ni ꞌne nuyu̱ yä däta tꞌo̱ho̱. ¿Hänge xa mähotho? Hyandi nuni zi bätsi ꞌuini nuni zi fantho̱. ¿Gi handi habu̱ ꞌme̱ni yä zate ꞌne habu̱ yꞌo yä fani? ¿Gi hohmä di ja ri nguu ha nꞌa luga ngu nuni?

Äjuä ne ge nuꞌi gi ꞌmu̱i pa nzäntho ha nꞌa uädri nuua ha Xiꞌmhai, habu̱ di otho nuꞌu̱ yä dumu̱i di nheki mäpaya. Pa nuꞌu̱ ma dä mꞌu̱i ha rä rꞌayꞌo uädri, rä Mäkä Tꞌofo mää: “Äjuä ma dä mꞌu̱i kongeꞌu̱. Hinto ma dä du, hinto ma dä nzoni, ha nixi hinto ma dä thogi yä u̱gi. Gatꞌho nuya yä tsꞌo tꞌo̱tꞌe ma dä uadi”.

Rä Hesu go geꞌä ma dä hä näꞌä hogä mꞌu̱i ha rä Xiꞌmhai. ¿Gi pädi hämꞌu̱? Hää, mꞌe̱fa de nuꞌmu̱ xti uadi dä hñäki gatꞌho yä tsꞌo tꞌo̱tꞌe ꞌne yä tsꞌomꞌu̱i jäꞌi de rä Xiꞌmhai. Beni, nuꞌmu̱ rä Hesu bi mꞌu̱i ha rä Xiꞌmhai, bi yꞌo̱the nuꞌu̱ mi hñeni, ꞌne asta bi gu̱tsꞌi rꞌa yä jäꞌi nuꞌu̱ xki du. Njabu̱ rä Hesu bi ꞌñudi näꞌä ma dä me̱fi ha gatꞌho rä Xiꞌmhai nuꞌmu̱ xti zo̱ho̱ dä Ndä ha rä Tsꞌu̱tꞌhui Äjuä.

¡Hängu rä johya ma gi pe̱ꞌtsi nuꞌmu̱ xki ꞌmu̱i ha näꞌä uädri! Rä Hesu ꞌne nuꞌu̱ yä jäꞌi xä huahni pa dä mända ha mähetsꞌi, ma dä su gatꞌho yä jäꞌi pa njabu̱ dä mꞌu̱i ko rä johya ha rä Xiꞌmhai. Ma gä handihu̱ te mähyoni gä pe̱fihu̱ pa njabu̱ Äjuä dä rꞌakägihu̱ nꞌa rä te pa nzäntho ha rä rꞌayꞌo uädri.