QAWAY hatun sachakunata, sumaq waytakunata chaynataq alto orqokunatapas. ¿Manachum chayqa sumaqcha? Qawaytaq, luwichupas warmachapa makinmanta mikuchkan. Chaynataq leonpas hinaspa caballopas pastopi kachkanku. ¿Munawaqchu kayna sitiopi wasiki kaptin kawsakuyta?

Diosqa munanmi manaña ñakaristin kay tiempopi hina Allpapi paraiso kaptin wiñaypaq kawsanaykita. Hamuq paraisopi kawsaqkunapaqmi kaynata Bibliaqa nin: ‘Diosñataqmi paykunawan kanqa. Manañam kanqachu wañuypas, waqaypas nitaq nanaypas. Ñawpaq kaqkunaqa pasarunñam’ nispa.

Jesusmi kayna sumaqta rurakunanpaq kamachikamunqa. ¿Yachankichu haykapitaq chayqa kanqa? Chaytaqa ruranqa Allpamanta mana allinkunata chaynataq mana allin ruraqkunatapas chinkachisqan qepatam. Yuyariy, Jesusqa kay pachapi kachkaspam onqoq runakunata sanoyachirqa wakinkunatapas wañusqankumanta kawsarichirqa. Chaynata ruraspanmi qawachirqa Allpantinpi Diospa munaychakusqanpi Rey hina kamachikamuspa rurananta.

¡Ima sumaqchá kanqa chay hamuq paraisopi kawsakuyqa! Jesusqa akllasqan runakunawanmi hanaq pachamanta gobiernamunqaku. Hinaspa Allpapi kaqkunamanta cuentallikuspanku llapallankuta yanapanqaku kusisqa kawsanankupaq. Qawasunchikyá imatam rurananchik hamuq paraisopi Diosqa wiñaypaq kawsachiwananchikpaq.