AKARA ana i te au pu rakau roroa, te au tiare manea e te au maunga teitei. Kare ainei teia i te ngai manea? Akara ana i te ria e kaikai ra mei te rima o tetai tamaiti meangiti. E akara ana i te au riona e te au oroenua e tu aere ra i roto i te kainga. Kare ainei koe e inangaro i te noo ki roto i tetai are i tetai ngai mei teia rai?

Inangaro te Atua ia koe kia noo e mutu kore ua atu i runga i te enua i roto i te parataito. E kare aia e inangaro ana ia koe kia maki e kia mamae mei te au tangata rai i teia tuatau. Teia te taputou a te Pipiria ki te aronga ka noo i roto i te parataito ou: ‘Ka noo te Atua kia ratou. Kare roa e mate me kore e aue me kore e mamae. Ka kore te au apinga taito.’

Ka akapapu a Iesu e kia raveia teia tauianga meitaki tikai. Kua kite koe e aea? Ae, i muri ake i tona tama anga i te enua i te au kino pouroa e te au tangata kino. Akamaara ana, ia Iesu i te enua nei kua akaora aia i te au tangata i to ratou au maki tukeke pouroa, e kua akaora aia i te tangata mei te mate. Kua rave a Iesu i teia i te akaari e eaa tana ka rave i runga i te enua katoa me riro mai aia ei Ariki no te patireia o te Atua.

Akamanako ana e mei teaa te mataora i te noo ki roto i te parataito ou i runga i te enua! Ka tutara mai a Iesu e te aronga tana i iki mei runga mai i te rangi. Ka akono teia au tutara i te tangata ravarai i runga i te enua e ka akapapu e te mataora ra ratou. Ka akara ana tatou e eaa ta tatou ka anoanoia kia rave i te akapapu e ka oronga mai te Atua i te ora mutu kore no tatou i roto i tona parataito ou.