AWONA vimiti vitalivitali, maluŵa ngakutowa kweniso mapiri ngatalingatali. Kumbi chithuthuzi ichi n’chakutowa cha? Awona mo pulu yo waryiya pajanja la mnyamata yo. Awona so mahachi ndi nkharamu pauteka po. Kumbi iwi ungayanja kuja pa malu nge yanga?

Chiuta wakhumba kuti iwi uzije ndi umoyu wamuyaya m’paradayisu pacharu chapasi. Ndipu wakhumba cha kuti iwi uzitamengi pamwenga kuvwa kuŵaŵa kwekosi ko ŵanthu asuzgika naku mazuŵa nganu. Bayibolo lilayizga ŵanthu wo azamuja m’paradayisu mufya kuti: ‘Chiuta wazamuja nawu. Kwazamuŵavi nyifwa, kuliya pamwenga vakuŵaŵa. Vinthu vakali vakapu.’

Yesu wazamuwoneskeska kuti vinthu vakukondweska ivi vizichitiki nadi. Kumbi uziŵa kuti vazamuchitika zukwanji? Ivi vazamuchitika asani iyu wazituzgapu vinthu vosi viheni pacharu kweniso ŵanthu aheni. Kumbuka kuti panyengu yo Yesu wenga pacharu, iyu wanguchizga ŵanthu wo ŵenga ndi matenda ngakupambanapambana ndipuso chinanga nkhuyuska ŵanthu akufwa. Yesu wanguchita ivi kuti walongo vo wazamuchita pacharu chosi chapasi asani wazija Fumu ya ufumu waku Chiuta.

Kumbi wawona sonu umoyu mo wazamujaliya m’paradayisu mufya panu pacharu? Yesu pamoza ndi anyaki wo iyu wasankha, azamuwusa kuchanya. Mafumu yanga ngazamuphwere munthu weyosi pacharu ndipu ngazamuwoneseska kuti weyosi ngwakukondwa. Tiyi tiwoni vo titenere kuchita kuti Chiuta wazitipaski umoyu m’paradayisu mufya.