KʼELA ja niwak teʼaltiki, ja tsamal nichimiki soka chaʼanil witsiki. ¿Anke jel tsamalik? Kʼela, ja yal kʼujlal cheji wan waʼel bʼa skʼabʼ ja yal keremi. Cha kʼela ja chojiki soka kawujik tekʼane ekʼ ja bʼa tsamal jobʼi. ¿Wan maʼ xa kʼana oj ajyan sakʼan bʼa jun lugar jastal it?

Ja Dyosi wa skʼana ja weʼn oj ajyan sakʼan tolabida bʼa Luʼum bʼa jun kʼachinubʼ bʼa mixa oj awi wokol jastal wan ekʼel ja bʼa jtyempotiki. Jani it wa skʼapa ja Biblia sbʼaja matik oj ajyuke sakʼan ja bʼa yajkʼachil Kʼachinubʼi. «Ja Dyosi tini oj ajyuk sokeʼa. Mixa oj ajyuk chamelchʼakel, mini okʼel cha mini ja syajali yujni ja jastik junuk it ekʼtaniʼa.»

Jesús yeʼnani oj skʼuluk ja jastik junuk it jel tsamali aʼekʼuk. ¿Pe jas tyempo oj skʼuluk? Tsaʼan yajni xchʼaya spetsanil ja jastik mi lekuk wan ekʼel ja bʼa Luʼumi soka ixuk winik mi lekuke. Ajuluk akʼujol, yajni Jesús ti ajyi bʼa Luʼumi stojbʼes ja ixuk winik matik maloʼayeʼi sok ya sakʼwuk jujuntik chamwinik. Ja it sjeʼa ja jasa oj skʼuluk bʼa yibʼanal ja Luʼum jastal mandaranum ja bʼa sGobyerno ja Dyosi.

¡Janekʼto maʼ stsamalil ajyel sakʼan ja bʼa yajkʼachil Kʼachinubʼi! Jesús sok jujuntik ixuk winik bʼa stsaʼuneji, oj yaʼe mandar lajan bʼa satkʼinal. Oj skʼel-e spetsanil ja matik oj ajyuk bʼa Luʼumi sok yeʼni xchole bʼa aʼajyuke gusto spetsanil ja ixuk winiki. La kiltik jasa oj jkʼuluktik bʼa jachuk ja Dyosi oj yaʼ jsakʼaniltik bʼa tolabida ja bʼa yajkʼachil sKʼachinubʼi.