KAʼAKXILHTI laklanka kiwi, xalakswan xanat chu xalaktalhman sipi. ¿Nixlikana pi lu lakswan? Kaʼakxilhti juki nema wayama kxmakan aktsu kgawasa. Chu kaʼakxilhti leones chu kawayu nema layakgolh chuna la tasiyay kdibujo. ¿Nixlakgati pi xtawi minchik niku xakastlan chuna la tasiyay unu kdibujo?

Dios lakaskin pi wix nalatapaya anta kxakalipaxaw Katiyatni chu nialh napatinana chuna la patinankgoy kristianos xala uku. Biblia wan pi chuna natawilakgoy wantiku nalatamakgoy kxakalipaxaw Katiyatni. Dios anta nakatatawilay. Nialhti katinilh nipara katianalh takatsanajwat. Putum tuku xapulana xʼanan titaxtunit nawan.

Jesús natlaway pi uma tuku nila tamakanajla chuna nalay. ¿Katsiya wix tukuya kilhtamaku chuna nalay? Xlikana, akxni masputunitta nawan putum tuku nitlan chu kristianos tiku lixkajni xtayat. Kalakapastakti, akxni Jesús xminit unu kkatiyatni kamapaksanilh putum xtajatatkan kristianos chu asta kamalakastakwanilh makgapitsi kristianos tiku xnikgonitta. Chuna limasiyalh tuku natlaway xlikalanka Katiyatni akxni namapakgsinan anta kxtamapakgsin Dios.

¡Katlawa la akxilhpata, lu litawilaputu nawan kxasasti xakalipaxaw Katiyatni! Jesús chu makgapitsi tiku xla kalaksakli namapakgsinankgoy anta kʼakgapun. Nakakuentajtlawakgoy tiku natawilakgoy kkatiyatni chu na nakakuentajtlawakgoy pi putum kristianos napaxawakgoy. Naʼakxilhaw tuku kilitlawatkan akinin xlakata Dios nakinkamaxkiyan latamat nema nikxni nasputa anta kxasasti xakalipaxaw Katiyatni.