LUKIM ol dispela bikpela diwai, ol naispela plaua, na ol traipela maunten. Em naispela ples tru, a? Lukim dispela dia i kisim kaikai long han bilong wanpela liklik mangi. Na lukim ol laion na ol hos. Yu laik i stap long wanpela haus long kain ples olsem?

God i laik bai yu stap oltaim long graun long naispela ples paradais. Na em i no laik bai yu kisim pen na hevi olsem ol man i kisim long nau. Baibel i mekim tok promis long ol man bai stap long dispela nupela Paradais, olsem: ‘God bai stap wantaim ol. Bai ol i no i dai moa o krai o kisim pen gen. Ol samting bilong bipo i pinis olgeta.’

Jisas bai mekim dispela gutpela samting i kamap. Yu save wanem taim em bai mekim olsem? Yes, taim em i pinisim pinis olgeta pasin nogut na ol man nogut. Tingim, taim Jisas i stap long graun em i bin oraitim ol man i gat kain kain sik, na em i kirapim bek ol man i dai pinis. Jisas i mekim olsem bilong soim ol samting em bai mekim long olgeta hap bilong graun taim em i stap King long Kingdom Bilong God.

Tingim gutpela sindaun tru bai kamap taim nupela Paradais i kamap long graun! Jisas wantaim ol lain em i makim, ol bai stap long heven na bosim ol man long graun. Ol bai lukautim olgeta man long graun, na helpim ol long i stap amamas. Orait nau yumi ken stori long ol samting yumi mas mekim na bai God i ken givim laip oltaim long yumi long dispela nupela Paradais.