KITAA an dagku nga kakahoyan, makaruruyag nga mga bukad ngan higtaas nga kabukiran. Makaruruyag gud dinhi, diri ba? Kitaa an bugsok nga ginpapakaon han bata ha iya kamot. Ngan kitaa an mga leon ngan mga kabayo nga aada ha kapatagan. Karuyag mo ba mag-ukoy ha balay nga aada ha lugar nga sugad hini?

Karuyag han Dios nga mabuhi ka ha waray kataposan ha paraiso nga tuna. Ngan diri niya karuyag nga mag-antos ka han bisan ano nga kasakit nga gin-aantos han mga tawo yana. Ini an saad han Biblia ha mga maukoy ha bag-o nga paraiso: ‘An Dios maupod ha ira. Waray na kamatayon o pagtangis o kasakit. An daan nga mga butang nag-agi na.’

Sisiguruhon ni Jesus nga matuman inin urusahon nga pagbag-o. Maaram ka ba kon san-o? Oo, katapos niya wad-on an ngatanan nga karaotan ha tuna ngan bungkagon an magraot nga tawo. Hinumdumi, han nakanhi hi Jesus ha tuna, iya gintambal an ngatanan nga klase hin sakit, ngan ginbanhaw pa ngani niya an mga patay. Ginbuhat ini ni Jesus basi ipakita kon ano an iya pagbubuhaton ha bug-os nga tuna kon hiya na an Hadi ha Ginhadian han Dios.

Hunahunaa la an makalilipay gud nga pagkinabuhi ha bag-o nga paraiso ha tuna! Magmamando ha langit hi Jesus upod adton iya ginpili. Mamangnoan hini nga mga magmarando an ngatanan ha tuna ngan sisiguruhon nga malipayon hira. Aton paghisgotan kon ano an kinahanglan naton buhaton basi masiguro nga tatagan kita han Dios hin kinabuhi nga waray kataposan ha iya bag-o nga paraiso.