HISITOLIA 115
Ko He Palatiso Foʼou ʼi Te Kele
ʼE KOUTOU sio ki te ʼu fuʼu ʼakau lalahi, te ʼu fisiʼi teu matalelei pea mo te ʼu moʼuga māʼoluga. ʼE mole matalelei koa la? Koutou sio ki te tia fafine ʼaē ʼe kai ʼi te nima ʼo te kiʼi tama. Pea ʼe koutou sio ki te ʼu laione pea mo te ʼu hōsi ʼi te malaʼe. ʼE mole koutou fia laga koa la hokotou ʼapi ʼi te koga meʼa ʼaenī?
ʼE loto ia te ʼAtua ke koutou maʼuʼuli ʼo heʼegata ʼi te palatiso ʼi te kele. Pea ʼe mole ina loto ke koutou toe logoʼi te ʼu mamahi ʼaē ʼe tau mo te hahaʼi ia ʼaho nei. Koʼeni te meʼa ʼaē ʼe fakapapauʼi mai e te Tohi-Tapu kia nātou ʼaē ka maʼuʼuli anai ʼi te palatiso foʼou ʼaia: ‘ ʼE nofo anai te ʼAtua mo nātou. ʼE mole toe ʼi ai anai he mate peʼe ko he kekē peʼe ko he mamahi. Kua pulihi te ʼu meʼa ʼāfea.’
ʼE ko Sesu ʼaē ka ina fakahoko anai te ʼu fetogi taulekaleka ʼaia. ʼE koutou ʼiloʼi koa peʼe hoko anai ʼafea? ʼE hoko anai ʼi tana ʼosi fakamaʼa te kele mai te agakovi fuli pea mo te hahaʼi agakovi. Tou manatuʼi te temi ʼaē neʼe nofo ai ia Sesu ʼi te kele, neʼe ina fakamālōlō te hahaʼi mai tonatou ʼu mahaki kehekehe, pea neʼe ina fakatuʼuake mo te ʼu hahaʼi mai te mate. Neʼe fai e Sesu te ʼu meʼa ʼaia moʼo fakahā ʼo te ʼu meʼa ʼaē ka ina fai anai ʼi te kele katoa, mokā Hau anai ʼi te Puleʼaga ʼo te ʼAtua.
ʼE ko he maʼuli taulekaleka anai ʼaē ka tou maʼu ʼi te palatiso foʼou ʼaia ʼi te kele! Ko Sesu pea mo nātou ʼaē neʼe fili, ʼe nātou hau anai ʼi selo. Ko te ʼu hau ʼaia ʼe nātou tokakaga anai ki te hahaʼi fuli ʼi te kele pea mo foaki kia nātou ʼaia ia te fiafia. Tou vakaʼi te meʼa ʼaē ʼe tonu ke tou fai, ke tou ʼiloʼi papau ai peʼe foaki mai anai e te ʼAtua kia tatou te maʼuli heʼegata ʼi tona palatiso foʼou.